ठोरीमा स्थापित सर्प दंश उपचार केन्द्रको सेवा प्रभावकारी
बीरगंज । पर्साको ग्रामीण भेगमा सर्प दंशका घटना वृद्धि भएसँगै ठोरीमा स्थापना भएको सर्प दंश उपचार केन्द्रको सेवा प्रभावकारी साबित हुँदै गएको छ ।
ठोरीस्थित सर्प दंश उपचार केन्द्रमा विगत दुई महिनामा ७६ जना सर्प दंशका घाइतेहरू उपचारका लागि आएको र उनीहरूको सकुशल उपचार गरिएको केन्द्रले जनाएको छ ।
विशेष गरी ठोरी, जगरनाथपुर, जिराभवानी, पटेर्वासुगौली गाउँपालिकाका सर्प दंशबाट घाइतेहरू उपचारका लागि ठोरी पुग्ने गरेका छन् ।
ठोरी गाउँपालिका वडा नं ४ मा रहेका नेपाली सेनाको सिद्धिबक्स गण निर्मलबस्ती पानीटंकीमा २०७६ फाल्गुन १८ गतेबाट स्थानीय प्रशासनसँग अनुमति लिएर उपचार सेवा सुरु भएको हो ।
उपचारका केन्द्र प्राविधिक नागेन्द्र मुडभरेका अनुसार अहिलेसम्म सो केन्द्रमा २ सय ४ जनालाई सर्प दंशका घाइतेको उपचार भएको र सो क्रममा अहिलेसम्म सिकिस्त घाइते एक जनाको मात्रै मृत्यु भएको छ ।
ठोरीमा चितवनको माडी नगरपालिका देखिएका विषालु सर्पले टोकेका घाइतेहरू आउने गरेका छन् ।
सर्प दंश उपचार केन्द्रका संस्थापक अध्यक्ष मानबहादुर श्रेष्ठले पर्सा राष्ट्रिय निकुञ्जको मध्यवर्ती वन व्यवस्थापन समितिको अध्यक्ष रहेका बेला नेपाली सेनाको समन्वयमा केन्द्रको स्थापना गरिएको बताउनुभयो ।
सर्प दंश उपचार केन्द्रको व्यवस्थापनका लागि ठोरी गाउँपालिकाको कार्यालय, सयपत्री बचत तथा ऋण सहकारी संस्था बिजयबस्ती तथा अन्य सङ्घ संस्थाले सहयोग गरेको अध्यक्ष श्रेष्ठले बताउनुभयो ।
बिरामीको उपचारका लागि आवश्यक एन्टीस्नेक भेनम स्वास्थ्य व्यवस्थापन कार्यालय हेटौडाबाट निःशुल्क ल्याउने गरेको र पर्सा जिल्लामा नारायणी अस्पतालको स्नेक बाइट वार्ड बाहेक ठोरीमा एक मात्र सर्प दंश उपचार केन्द्र रहेको श्रेष्ठले बताउनुभयो ।
प्रतिक्रिया राख्नुहोस्