न्यायपालिका कहिल्यै पनि आफ्नो कर्तव्यबाट चुक्दैन : प्रधानन्यायाधीश जबरा
काठमाडौँ । प्रधानन्यायाधीश चोलेन्द्र शमशेर जबराले न्यायपालिकाले देश, जनता र संविधानका लागि समर्पित भएर काम गर्दै आएको बताउनुभएको छ ।
नेपाल बार काउन्सिलको २८ औँ स्थापना दिवस तथा काउन्सिलद्वारा प्रकाशित कानून पत्रिकाको आज ललितपुरमा लोकार्पण गर्नुहुँदै प्रधानन्यायाधीश जबराले देश र जनताप्रति अभिप्रेरित भएर न्यायपालिकाले काम गर्दै आएकाले न्यायपालिका कहिल्यै पनि आफ्नो कर्तव्यबाट नचुक्ने बताउनुभयो ।
प्रधानन्यायाधीश जबराले न्यायपालिकाको सबलीकरणका लागि न्याय परिषद्को संरचनामा सुधारको आवश्यकता रहेको पनि बताउनुभयो ।
कार्यक्रममा कानून न्याय तथा संसदीय मामिला मन्त्री ज्ञानेन्द्रबहादुर कार्कीले मर्यादित समाज निर्माणमा सबै जुट्नुपर्नेमा जोड दिनुभयो ।
कानून मन्त्री कार्कीले न्यायपालिकाले संविधानको रक्षा गर्ने काम गर्दे आएको उल्लेख गर्नुहुँदै देशको हितका निम्ति सबैलाई एक ठाउँमा उभिन आग्रह गर्नुभयो ।
महान्यायाधिवक्ता एवं नेपाल कानून व्यवसायी परिषद्का अध्यक्ष खम्बबहादुर खातीले न्याय क्षेत्रलाई विश्वसनीय बनाउनु सबैको जिम्मेवारी भएको बताउनुभयो ।
त्यस अवसरमा नेपाल बार एशोसिएसनका अध्यक्ष चण्डेश्वर श्रेष्ठ, पूर्व महान्यायाधिवक्ता रमेश बडाल, वरिष्ठ अधिवक्ता कृष्णप्रसाद भण्डारी लगायतका वक्ताले संविधानको रक्षकको रुपमा न्यायपालिकाले भूमिका खेल्नुपर्ने र त्यसमा सबैको सकारात्मक सहयोग रहनुपर्नेमा जोड दिनुभयो ।
प्रतिक्रिया राख्नुहोस्