कर्णाली प्रदेशका मुख्य न्यायाधिवक्ता मानन्धरको राजीनामा स्वीकृत 

सुर्खेत । कर्णाली प्रदेशका मुख्यन्यायाधिवक्ता विद्या भूषण मानन्धरको राजीनामा स्वीकृत भएको छ ।

कर्णाली प्रदेश प्रमुखको कार्यालय सुर्खेतले जारी गरेको परिपत्र अनुसार नेपालको संविधानको धारा १६० को उपधारा (४) (क) बमोजिम बिहीबार प्रदेश सरकारका मुख्य कानुनी सल्लाहकार मानन्धरको राजीनामा स्वीकृत गरिएको हो ।

मानन्धरले कर्णाली प्रदेशका मुख्यमन्त्री महेन्द्रबहादुर शाहीमार्फत कर्णाली प्रदेश प्रमुख गोविन्दप्रसाद कलौनी समक्ष पेस गरेको राजीनामा स्वीकृत भएको मुख्य न्यायाधिवक्ताको कार्यालय सुर्खेतका सूचना अधिकारी खेमराज केसीले जानकारी दिनुभयो ।

उहाँले मानन्धरको राजीनामा फागुन १ गतेदेखि लागु हुने स्वीकृत भएको जानकारी दिनुभयो ।

उहाँका अनुसार मानन्धर कर्णाली प्रदेश सरकारको मुख्य कानुनी सल्लाहकारको रुपमा नेपालको संविधान धारा १६० को उपधारा (२) बमोजिम २०७४ चैत २८ गते मुख्य न्यायाधिवक्ताको पदमा नियुक्त भएका हुनुभएको थियो।