निर्यातमा ६ प्रतिशतले वृद्धि, आयातमा ५ प्रतिशतले कमी

काठमाडौँ । चालू आर्थिक वर्षको पहिलो ६ महिनामा विदेशी वस्तुको आयातमा कमी आउँदा निर्यातमा वृद्धि भएको छ ।

भन्सार विभागले सार्वजनिक गरेको साउनदेखि पुस मसान्तसम्म छ महिनाको तथ्याङ्क अनुसार ५ प्रतिशत आयातमा कमी आउँदा ६ प्रतिशतले निर्यातमा वृद्धि भएको हो ।

विभागको तथ्याङ्कअनुसार चालू आवको ६ महिनाको अवधिमा ६ खर्ब ६१ अर्ब बढीको विदेशी वस्तुको आयात भएको छ । जुन गत आवको सोही अवधिको तुलनामा ४ दशमलव ८१ प्रतिशतले कम रहेको  भन्सार विभागले जनाएको छ ।

यसै गरी, ६ महिनाको अवधिमा  ६० अर्ब ८० करोड बराबरको स्वदेशी वस्तु निर्यात भएको छ ।

गत आवको सोही अवधिको तुलनामा ६ दशमलव १४ प्रतिशतले निर्यातमा वृद्धि भएको हो । गत आवको सोही अवधिमा  ५७ अर्ब २७ करोड बराबरको स्वदेशी वस्तु निर्यात भएको थियो ।

तथ्याङ्क अनुसार यस वर्ष व्यापार घाटामा ५.८० प्रतिशतले सुधार भएको छ ।

वैदेशिक व्यापारमा आयातको हिस्सा ९१.५८ र निर्यातको हिस्सा ८.४२ प्रतिशत रहेको छ । भन्सार विभागले हालसम्म एक खर्ब ८७ अर्ब राजश्व सङ्कलन गरिसकेको छ ।

यो वर्ष विभागले चार खर्ब ४० अर्ब राजश्व सङ्कलन गर्ने लक्ष्य लिएको छ ।