मुलुकको समृद्धि र विकासका लागि चुनावको विकल्प छैन : उपप्रधानमन्त्री पोखरेल

जनकपुरधाम । उपप्रधानमन्त्री एवं नेकपा सचिवालयका सदस्य ईश्वर पोखरेलले प्रधानमन्त्री के पी ओलीको देश बनाउने सपनालाई साकार पार्नका लागि नयाँ जनादेशको विकल्प नभएको बताउनु भएको छ ।

उपप्रधानमन्त्री पोखरेलले नेकपा धनुषाद्वारा आज जनकपुरधाममा आयोजना गरिएको कार्यकर्ता भेलामा अहिले पूर्व मेची देखि महाकालीका जनताहरू प्रधानमन्त्री के पी ओलीको निर्णयको साथ रहेकाले देशमा चुनावी वातावरण बन्दै गएको बताउनु भयो ।

उहाँले वर्तमान सरकारले पार्टीका तानातानको बाबजुद पनि गरेको कामकाजबाट आम नेपाली जनता निक्कै खुसी भएको बताउँदै पूर्व पश्चिम रेलमार्गको निर्माणको शुरुवात, विभिन्न राजमार्गको निर्माणमा तीव्रता आउनु र हुलाकी राजमार्गको निर्माणमा गति आउनु यसको उदाहरण भएको बताउनु भयो ।

उपप्रधानमन्त्री पोखरेलले राष्ट्र तथा राष्ट्रियताको पक्षमा वर्तमान प्रधानमन्त्री के पी ओलीले भारत तथा चीनसँग समान सम्बन्ध राख्नमा सफल हुनु भएको बताउँदै पछिल्लो पटक भारतसँग भएको सम्झौताका कारणले कुनै पनि अवस्थामा भारतले नाकाबन्दी गर्न नमिल्ने बताउनु भयो ।

उहाँले पार्टीको एकता तथा हितविपरित जाने आफै समाप्त भएर जाने बताउँदै आम नेता तथा कार्यकर्ता अहिले पनि पार्टी एकताको पक्षमा भएको बताउनु भयो ।

उपप्रधानमन्त्री पोखरेलले ६४ प्रतिशत बहुमतको सरकारलाई आफ्नै पार्टी भित्रबाट कामकाज गर्न नदिएको कारणले संसद्को विघटन गर्नु परेको बताउँदै अगामी वैशाख १७ र २७ गते हुने मध्यावधि चुनावका लागि तयार रहन कार्यकर्तालाई आग्रह गर्नु भयो ।

उहाँले प्रधानमन्त्री के पी ओलीको देश बनाउने सपनालाई साकार पार्नका लागि उहाँको नेतृत्वमा रहेको नेकपाले वैशाखमा हुने चुनावमा ठुलो जनसमर्थन पाउने अवस्था जिल्ला जिल्लाहरूमा भएको बृहत् भेलाले सङ्केत गरेका बताउनु भयो ।

शहरी विकासमन्त्री प्रभु साहले संसद्को विघटन ६४ प्रतिशत बहुमतका प्रधानमन्त्रीले गर्नु भएकाले संसद् पुर्न स्थापनाको कुनै सम्भावना नभएकाले लोकतान्त्रिक अग्रगामी निकासका लागि चुनावको कुनै विकल्प नभएको बताउनु भयो ।

उहाँले नेकपाका डेट स्पायर भएका नेताले केही गर्न नसक्ने बताउँदै जनतालाई भ्रमित गर्ने, झुठो आश्वासन बाँड्ने तथा स्वार्थको राजनीतिक गर्नेलाई जनताले राम्ररी चिनिसकेको बताउनु भयो ।

न्याय तथा कानूनमन्त्री लिला श्रेष्ठले राष्ट्रियताको पक्ष होस् वा नेपाली जनताको विकास निर्माणको चाहना पुरा गर्नमा किन नहोस् के पी ओली नेतृत्वका सरकारले गरेको कामकाज विगतका कुनै पनि सरकारबाट नभएको दाबी गर्नु भयो ।

महिला, बालबालिका तथा ज्येष्ठ नागरिक मन्त्री जुली कुमारी महासेठले प्रधानमन्त्री के पी शर्मा ओलीको समृद्ध नेपाल सुखी नेपालीको चाहना पुरा गर्नका लागि अगामी वैशाख १७ र २७ गतेको चुनाव सफल बनाउनुको विकल्प नभएको बताउनु भयो ।

नेकपा स्थायी कमिटीका सदस्य रघुवीर महासेठले २ सय ५० वर्षमा भएका सरकारले नगरेका कामकाज वर्तमान सरकारले तीन वर्षमा गरेर देखाएको बताउँदै २०७८ सालमा पुनः प्रधानमन्त्री के पी ओलीको नेतृत्वमा सरकारले बन्ने दाबी गर्नु भयो ।

नेकपा धनुषाका नेता राजकिशोर यादवको अध्यक्षतामा भएको सो कार्यक्रममा मिथिला नगरपालिकाका प्रमुख हरिनारायण महतो, प्रदेश सभाका सदस्य ज्वाला साह, नेकपाका पुराना नेता असर्फि भिनवार यादव तथा योगनारायण यादवले बोल्नु भएको थियो ।

यस अघि जनकपुरधामको रेल्वे स्टेसनबाट निष्केको रैली जनकपुरधामको विभिन्न भागमा परिक्रमा गरेर पार्टी कार्यालयमा पुगी बृहत् कार्यकर्ता भेलामा परिणत भएको थिए ।