पहिरोले पुर्दा एक बेपत्ता

गलकोट- बागलुङकोे बडिगाड गाउँपालिकामा पहिरोले पुरिएर एक जना बेपत्ता भएका छन् । बिहीबारदेखि परेको निरन्तर वर्षापछि खसेको पहिरोले बारीमा काम गर्दै आएका बडिगाड गाउँपालिका–१० निगलपानीका– ३५ वर्षीय दानबहादुर घर्तीमगर बेपत्ता हुनुभएको जिल्ला प्रहरी कार्यालयका प्रहरी निरीक्षक दीपक रिजालले जानकारी दिनुभयो ।

घर्तीमगर आज बिहान तरकारीबारीमा काम गरिरहँदा माथिबाट खसेको पहिरोले पुरेर बेपत्ता हुनुभएको हो । स्थानीयवासीको सक्रियतामा बेपत्ताको खोजी जारी छ । घटनास्थलतर्फ भीमगिठे प्रहरी चौकीबाट उद्धारका लागि प्रहरी खटाइएको छ ।