पाल्पामा कोरोना सचेतना, हात धुन सिकाउनेदेखि माइकिङसम्म

पाल्पा । पाल्पामा दुई वटा अस्पतालमा आइसोलेसन श्यया तथा तानसेनको सेन माध्यमिक विद्यालयमा क्वारेन्टाइन स्थापना हुने भएको छ । तानसेनमा रहेको सेन माध्यमिक विद्यालयमा क्वारेन्टाइन स्थापना गर्ने तानसेन नगरपालिकाका नगरप्रमुख अशोककुमार शाहीले जानकारी दिनुभयो ।

उहाँले जिल्लाका विभिन्न टोल विकास संस्था, महिला समूह, महिला स्वास्थ्य स्वयंसेविका, परिचालित गरेर स्वस्थ रहन अभिप्रेरित गर्ने बताउनुभयो । कोरोनाको भाइरस नेपालमा फैलिन नदिन आशङ्का लागेका बिरामीलाई तानसेनको लुम्बिनी मेडिकल कलेज तथा युनाइटेड मिसन अस्पतालमा आइसोलेसन श्यया रहेको उहाँले जानकारी दिनुभयो ।

रामपुर नगरपालिकाले पनि १० हजार मास्क वितरण, रामपुर अस्पतालमा पाँच वटा श्ययामा आइसोलेसन निर्माण, तथा अन्य जिल्लाबाट सवारी साधनमा रामपुर भित्रने यात्रुका लागि स्वास्थ्य जाँचका निम्ति सहायता कक्ष स्थापना गर्ने नगरप्रमुख रमणबहादुर थापाको भनाइ छ ।

कोरोना भाइरसको सङ्क्रमण फैलिन नदिन विभिन्न कार्यक्रम जिल्लाभरि भइरहेका छन् । दश स्थानीय तह रहेको पाल्पामा सबैजसो स्थानीय तहले फरकफरक सचेतनामूलक कार्यक्रम गरिरहेका छन् । पाल्पाको रैनादेवी छहरा गाउँपालिकामा सहायता कक्ष राखेर जाँच गरिने गाउँपालिकाका अध्यक्ष रामबहादुर कार्कीले जानकारी दिनुभयो ।

गाउँपालिकाले मास्क वितरण, पर्चा पम्पलेट वितरणसमेत गरेको छ । गाउँपालिका गाउँटोलमा कोरोनाबाट सङ्क्रमित नहुन तर सचेत रहन भन्दै माइकिङमार्फत आग्रह गरेको छ ।

रम्भा गाउँपालिकामा घरघरमै पुगेर स्वास्थ्यमूलक जानकारी गराइएको छ । सबै स्वास्थ्यसंस्थामा अभिमुखीकरण कार्यक्रम आयोजना गरी महिला स्वास्थ्य स्वयंसेविका, पोषण सहयोगी सहजकर्तालाई घरघरमा पुगेर नागरिकलाई सचेत रहन अनुरोध गर्ने, साबुनपानीले मिचिमिची हात धुन सिकाउने योजना अगाडि सारेको छ ।

एकसय १५ स्वयंसेवी परिचालन गरेर घरघरमा सचेतना बाँड्ने गाउँपालिकाका अध्यक्ष विष्णुप्रसाद भण्डारीले जानकारी दिनुभयो । जिल्लाको पूर्वखोला गाउँपालिकाले गाउँका विकट क्षेत्रमा सबैभन्दा बढी चेतनाको विकास गर्न आवश्यकता ठानेर अभिमुखीकरण तथा हात धुने सीप सिकाउने कार्यलाई तीव्रता दिएको स्वास्थ्य शाखा संयोजक मोहन ढकालको भनाइ छ । बाक्लो मगर समुदायको बस्ती रहेको निस्दीमा टोलटोलमा कोरोनाको लक्षण, कोरोनाको सङ्क्रमणबाट बच्ने उपाय सिकाइएको गाउँपालिकाका उपाध्यक्ष रिता अर्यालले बताउनुभयो ।

भारतसँग सिमाना जोडिएको क्षेत्रसँग नजिक र मानिसको ओहोरदोहोर बढी हुने क्षेत्र भएका कारण पाल्पामा बढी सुरक्षा संयमता अपनाएको स्थानीय तहले जनाएका छन् ।