बालबालिकाका लागि उद्योगमै शिक्षा

कावासोती। इँटा उद्योगमा बालश्रमिकको प्रयोग भएको र यसको रोकथामका लागि आवाजहरु उठिरहँदा यहाँका इँटा उद्योगले भने उद्योगमा रहेका बालबालिकालाई आधारभूत शिक्षा दिइरहेका छन् ।

नवलपरासीपूर्व नवलपुरमा रहेका दुई इँटा उद्योगले नयाँ प्रयोगका रूपमा उद्योगमा रहेका बालबालिकालाई काममा लगाउनुको सट्टा शिक्षा प्रदान गरिरहेका छन् । उद्योगमा कार्यरत श्रमिकका बालबालिका शिक्षाबाट वञ्चित हुन नपरुन् भनेर उद्योग परिसरमा नै आधारभूत शिक्षा प्रदान गरिरहेका छन् ।

देवचुलीनगरपालिका–१ केउरेनीमा रहेको माता मनकामना चिम्नी इँटा उद्योगले उद्योग परिसरभित्रै बालविकास तथा सिकाइ केन्द्र स्थापना गरेर बालबालिकालाई शिक्षा प्रदान गरिरहेको इँटा उद्योगका सञ्चालक कृष्णप्रसाद गौतमले बताउनुभयो ।

“बालबालिका शिक्षाबाट वञ्चित नहून् भनेर हामीले आधारभूत शिक्षा दिने प्रबन्ध गरेका हौँ”, सञ्चालक कृष्णप्रसाद गौतमले भन्नुभयो, “अध्यापन गराउनका लागि छुट्टै भवन बनाइएको छ, एकजना शिक्षकसमेत राखेका छौँ ।”

शिक्षा पाउनु बालबालिकाको अधिकारसमेत भएकाले त्यसको प्रत्याभूत गर्न आफूहरु लागिरहेको उहाँले बताउनुभयो । उहाँका अनुसार अहिले यस उद्योगमा कार्यरत श्रमिकका ४३ बालबालिकाले अध्ययन गरिरहेका छन् । उद्योगमा काम गर्ने श्रमिक धेरैजसो भारत र नेपालको पूर्वी तराई जिल्लाका हुने गरेको सञ्चालक गौतमले बताउनुभयो ।

वर्षाको समयमा उद्योगमा काम नहुँँदा उनीहरु आफ्नै गृहनगरमा अध्ययन गर्ने र कामका क्रममा बुबाआमासँगै आउँदा यहाँ अध्ययन गर्ने गरेको उहाँले बताउनुभयो । यसले बालबालिकाको अध्ययनमा निरन्तरता हुने गरेको उहाँको भनाइ छ । भारतबाट आएका बालबालिकाको अध्ययनका लागि भने भाषामा केही समस्या हुने गरेको उहाँको भनाइ छ ।