‘ए’ डिभिजन लिग: आज मछिन्द्र र थ्री स्टार भिड्दै

काठमाडौं– कतार एयरवेज सहिद स्मारक ‘ए’ डिभिजन लिगअन्तर्गत आज (सोमबार)बाट नवौं चरणका खेल सुरु हुँदैछन्।

लिगअन्तर्गत आज दुई खेल हुँदैछन्।

त्रिपुरेश्वरस्थित दशरथ रंगशालामा मध्याह्न १२ बजे सुरु हुने पहिलो खेलमा दुई विभागीय टोली नेपाल पुलिस क्लब र सशस्त्र प्रहरीको एपीएफ क्लब भिड्दै छन्।

आजको खेलमा अंकतालिकामा आठौं स्थानमा रहेको पुलिस चौथो जित निकाल्ने रणनीतिमा हुनेछ। उसले दुई खेल बराबरी खेलेर ११ अंक बनाएको छ। उता १३ औं स्थानको एपीएफ पनि खेल जितेर अंकतालिकामा माथि उक्लने दाउमा छ। एपीएफले एक जित र दुई बराबरी खेलेर ५ अंक बनाएको छ।

त्यस्तै, दशरथ रंगशालामै दिउँसो ३ बजे सुरु हुन लागेको दोस्रो खेलमा राष्ट्रिय टोलीका खेलाडीको बाहुल्यता रहेको मछिन्द्र र लोकप्रिय फुटबल क्लब थ्री स्टार भिड्दै छन्।

उपाधि दाबेदारको होडमा रहेका दुवै टोलीले लिगमा राम्रो प्रदर्शन गरिरहेका छन्। मछिन्द्र १६ अंकका साथ अंकतालिकाको दोस्रो स्थानमा छ भने थ्री स्टारका १४ अंकका साथ तालिकाको चौथो स्थानमा छ।

आजको खेलमा जित निकालेमा मछिन्द्र तालिकाको शीर्ष स्थानमा उक्लने छ भने थ्री स्टार तालिकाको दोस्रो स्थानमा आउने छ।