प्रविधि मैत्री बन्दै सुदूरपश्चिम प्रदेश
अत्तरिया कैलाली । सुदूरपश्चिम प्रदेश सभासँग अब सुदूरपश्चिम प्रदेशका स्थानीय तहहरू पनि जोडिने भएका छन् ।प्रदेश सभाको गतिविधि र स्थानीय तहको विषयमा छलफल गर्न सुदूरपश्चिम प्रदेशमा ‘भिडियो कन्फ्रेन्स’ सुरु हुन लागेको छ ।
युएनडिपीको सहयोगमा नौ वटै जिल्लामा भिडियो कम्फ्रेन्सका लागि उपकरणहरू जडान गरिएको हो ।
प्रदेशसभालाई स्थानीय तहसँग समन्वय र छलफलका लागि भिडियो कन्फ्रेन्स सुरु गर्न लागिएको सभामुख अर्जुन बहादुर थापाले बताउनुभयो ।
सभामुख थापाले यस विषयमा आज पत्रकार सम्मेलन गरेर जानकारी गराउनु भएको हो । प्रदेशसभालाई अझै प्रभावकारी बनाउन प्रदेश सभा भवनमा थप प्रविधि जडान गरिएको उहाँले बताउनुभयो ।
कैलाली बाहेक अन्य सबै जिल्लाका समन्वय समितिमा यो प्रविधि जडान गरिसकेको प्रदेशसभा सचिवालयले जनाएको छ । कैलालीको लागि भने टीकापुर नगरपालिकामा यो जडान गरिएको छ ।
प्रदेश सभा र जिल्ला समन्वय समिति एउटै परिसरमा रहेका कारण यसैबाट काम हुने प्रदेशसभा सचिवालयको भनाई छ ।
सुदूरपश्चिम प्रदेशमा जडान गरिएको भिडियो कन्फ्रेन्सको परीक्षण समेत भइसकेको प्रदेशसभा सचिवालयका नासु भुरी प्रसाद जोशीले बताउनुभयो ।
प्रदेश सभाले आगामी माघ ६ गतेदेखि सुरु हुन लागेको हिउँदे अधिवेशनको प्रत्यक्ष प्रसारण गर्ने तयारी सुरु गरिएको छ ।
प्रतिक्रिया राख्नुहोस्