मदन भण्डारी कप अन्तर्राष्ट्रिय भलिबलमा पुलिसको लगातार दोस्रो जित

रुपन्देही। बुटवलमा जारी मदन भण्डारी कप अन्तर्राष्ट्रिय आमन्त्रित रनिङ्ग शिल्ड पुरुष भलिबल प्रतियोगितामा विभागीय टोली नेपाल पुलिस क्लबले  लगातार दोस्रो जित निकालेको छ । बुटवलको बिआइसिसी सम्मेलन केन्द्रमा बुधबार भएको खेलमा पुलिसले खैरा भलिबल क्लब पन्जाबलाई ३–१ को सेटमा हराएको हो ।

पुलिसले खैरामाथि २६–२४, २६–२४, २०–२५, २५–१९ को नतिजा निकाल्यो । समूह ‘ए’ मा लगातार दोस्रो जितसँगै पुलिसको सेमिफाइनल सम्भावना बलियो बनेको छ । यसै समूहको अर्को खेलमा मणिमुकुन्द भलिबल क्लबले श्रीलङ्का पुलिस क्लबलाई ३–० को सेटमा हरायो । मणिमुकुन्दले श्रीलङ्का पुलिसमाथि २५–१९, २५–२०, २५–१६ को जित निकाल्यो । मणिमुकुन्द भलिबल क्लबको यो पहिलो जित हो । श्रीलङ्काको यो लगातार दोस्रो हार हो । समूहको पहिलो खेलमा श्रीलंकन टोली नेपाल पुलिस क्लबसँग ३–० को सेटमा पराजित भएको थियो ।

यस्तै समूह ‘बी’ अन्तर्गत बुधबार भएको खेलमा सभापोखरी भलिबल क्लबले भारतको गुजराज स्पोर्टिङस् क्लबलाई ३–० को सोझो सेटमा हरायो । भारतीय खेलाडीकै वर्चस्व रहेको सभापोखरी क्लबले गुजरातमाथि २५–१८, २५–१३, २५–२१ को जित निकालेको थियो ।

मदन भण्डारी स्पोट्र्स एकेडेमीले आयोजना गरेको प्रतियोगितामा विदेशका तीन र नेपालको चार गरी सात टोलीको सहभागिता रहेको छ । असोज १७ गतेसम्म सञ्चालन हुने प्रतियोगिताको विजेता टोलीले रनिङ्ग शिल्डसहित सात लाख रुपैयाँ र उपविजेताले तीन लाख ५० हजार रुपैयाँ पुरस्कार प्राप्त गर्नेछन् ।

यस्तै तेस्रो हुनेलाई एक लाख ७५ हजार रुपैयाँ तथा सान्त्वना पुरस्कार स्वरूप ७५ हजार रुपैयाँ, कप, मेडल र प्रमाणपत्र प्रदान गरिने आयोजक एकेडेमीका अध्यक्ष ध्रुब आचार्यले जानकारी दिनुभयो ।

प्रतियोगिताको उत्कृष्ट खेलाडीलाई १५ हजार रुपैयाँ, व्यक्तिगत विधातर्फ उत्कृष्ट स्पाइकर, सेटर, सर्भर, ब्लकर, डिफेन्डर र उत्कृष्ट प्रशिक्षकलाई जनही आठ हजार रुपैयाँसहित सम्मान गरिने आयोजकले जनाएको छ । प्रतियोगिताको पूर्वराष्ट्रपति विद्यादेवी भण्डारीले हिजो उद्घाटन गर्नुभएको थियो ।