डडेल्धुराको प्रसिद्ध लाटागन्याप देवताको शिखर जाँत असोज ८ गते

डडेल्धुरा। डडेल्धुराको गन्यापधुरामा अवस्थित प्रसिद्ध लाटागन्याप देवताको शिखर जाँत आगामी असोज ८ गते हुने भएको छ।

गन्यापधुरा गाउँपालिका-२ को महाभारत वनक्षेत्रको घना जङ्गलस्थित शिखर भन्ने स्थानमा भगवान् शिवका रूपमा लाटागन्यापको धूमधामका साथ पूजाआजा गरी जाँत मनाइने परम्परा छ। जाँतका लागि विभिन्न ६ वटा गाउँबाट देउरो लैजाने गरिन्छ। गन्यापधुरा गाउँपालिकाका मालिगाउँ, रुमायल, जैसेरा र रेल तथा डोटीको शिखर नगरपालिकाका थप्सा र बानीडुग्रेसैनबाट संयुक्त रूपमा देउरो लैजाने परम्परा रहेको गाउँपालिका अध्यक्ष इन्द्रबहादुर कार्कीले जानकारी दिनुभयो। देउरो लैजाने क्रममा विभिन्न स्थानमा दाइन, दमाहा तथा भोक्कर बजाउने गरिन्छ।

यसैबीच जाँतका अवसरमा असोज ८ गते गन्यापधुरा गाउँपालिकाले सार्वजनिक बिदा दिएको छ। गाउँपालिकाका निमित्त प्रमुख प्रशासकीय अधिकृत मीनबहादुर विष्टद्वारा जारी सूचनाअनुसार असोज ८ गते बिहीबार शिखर मेला पर्ने भएकाले गाउँपालिकाको कार्यालय, मातहतका सरकारी कार्यालय तथा शैक्षिक संस्थाहरूमा बिदा दिइएको हो।

गाउँपालिकाको नामसमेत यिनै प्रसिद्ध लाटागन्याप देवताको नामबाट राखिएको हो।