रास्वपा सभापति लामिछाने र अमेरिकी विदेशमन्त्री रुबियोबीच टेलिफोन वार्ता

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र अमेरिकी विदेशमन्त्री मार्को रुबियोबीच आज टेलिफोन वार्ता भएको छ ।

रास्वपाका प्रवक्ता जगदिश खरेलका अनुसार अमेरिकी विदेशमन्त्री रुबियोले भोटेकोशी बाढीबाट भएको जनधनको क्षतिप्रति गहिरो दुःख व्यक्त गर्दै विपद्को यस घडीमा नेपाल र नेपाली जनताप्रति ऐक्यबद्धता जनाउनुभएको छ ।

वार्ताका क्रममा सभापति लामिछानेले नेपाल सरकारले खोज, उद्धार तथा राहतका लागि उपलब्ध सबै स्रोतसाधन परिचालन गरिरहेको जानकारी गराउनुभएको थियो ।

उहाँले नेपाली नागरिकसँगै नेपालमा रहेका विदेशी नागरिकको सुरक्षाप्रति पनि सरकार उत्तिकै प्रतिबद्ध रहेको बताउनुभयाे ।

सभापति लामिछानेले विपद्को कठिन समयमा अमेरिकाले गरेको सहयोगप्रति अमेरिकी सरकारलाई धन्यवाद व्यक्त गर्नुभयाे ।

जवाफमा अमेरिकी विदेशमन्त्री रुबियोले नेपाल सरकारलाई आवश्यक परे थप सहयाेग उपलब्ध गराउने प्रतिबद्धता जनाउनुभएकाे थियाे ।