अमेरिकाले प्रतिनिधिमण्डलको यात्रा रद्द गरेपनि इरानी विदेशमन्त्री पुनः पाकिस्तान आउने सम्भावना

इस्लामावाद । अन्तर्राष्ट्रिय मध्यस्थकर्ताहरूले शान्ति वार्तालाई सही दिशामा ल्याउने प्रयास गरिरहेका बेला इरानका विदेशमन्त्री आइतबार पुनः पाकिस्तान फर्कने कार्यक्रम रहेको बताउनुभएको छ । 

अमेरिकी राष्ट्रपति डोनाल्ड ट्रम्पले आफ्ना दूतहरूको प्रस्तावित भ्रमण रद्द गरे पनि विदेशमन्त्री आइतबार पुनः पाकिस्तान जानसक्ने इरानी सञ्चारमाध्यमले अधिकारीहरूलाई उद्धृत गरी बताएका छन् । 

इरानी समाचार एजेन्सी इस्ना (आइएसएनए) का अनुसार विदेशमन्त्री अब्बास अराघचीले फेरि पाकिस्तानी अधिकारीहरूलाई भेट्नुहुनेछ र ‘युद्ध पूर्ण रूपमा अन्त्य गर्ने कुनै पनि समझदारीको ढाँचामा इरानको स्थिति र विचारहरू’ व्यक्त गर्नुहुनेछ । 

इस्नाका अनुसार मन्त्री अघिल्लो दिन मात्र इस्लामावादमा पुगी त्यहाँका उच्च पदस्थ अधिकारीसँग स्थायी युद्धविराम र शान्तिका लागि आफ्नो तर्फबाट धारणा राख्नुभएको थियो भने मध्यस्थकर्तामार्फत अमेरिकी प्रस्ताव सुन्नुभएको थियो ।  त्यसपछि उहाँ इस्लामावादबाट पहिले नै तय गरिएको ओमानका लागि प्रस्थान गर्नुभएको थियो । अन्य इरानी दूतहरू ‘युद्ध अन्त्यसँग सम्बन्धित मुद्दाहरूमा परामर्श र आवश्यक निर्देशनहरू प्राप्त गर्न’ तेहरान फर्किएका थिए। 

मस्कटका लागि उड्नुअघि उहाँले शनिबार पाकिस्तानी सेना प्रमुख असिम मुनिर, प्रधानमन्त्री शहबाज सरिफ र विदेशमन्त्री इशाक दारसँग भेटवार्ता गर्नुभएको थियो । इस्लामावादमा हुने वार्तापछि उहाँ मस्को जाने अपेक्षा गरिएको छ । 

अराघचीले आफ्नो प्रारम्भिक पाकिस्तान भ्रमणलाई ‘धेरै फलदायी’ भन्नुभएको छ तर वाशिङ्गटनको मनसायमा शङ्का व्यक्त गर्नुभयो। “अमेरिका कूटनीतिको बारेमा साँच्चै गम्भीर छ कि छैन भनेर हेर्न बाँकी छ,” उहाँले थप्नुभयो । 

इस्लामावादमा शनिबार भएको इरान–पाकिस्तान बैठकअघि ह्वाइट हाउसले ट्रम्पका शान्ति दूत स्टिभ विटकोफ र ज्वाइँ जारेड कुश्नर थप वार्ताका लागि पाकिस्तान जाने योजना रहेको बताएको थियो, तर पछि ट्रम्पले फक्स न्युजलाई दिएको एक अन्तरवार्तामा आफूले यात्रा रद्द गरेको बताउँदै ‘केही पनि नबोलेर बस्नु’ कुनै अर्थ नहुने बताउनुभएको थियो । 

उहाँले तेहरानको वार्ताको सर्तलाई अस्वीकार गरेको बताउनुभएको थियो । यद्यपि, यसको केही क्षणमा नै उहाँले आफ्नो प्रस्तावमा संशोधन गरेको बताउनुभयो ।  

राष्ट्रपति ट्रम्पले पत्रकारहरूसँग भन्नुभयो, “इरानले जति बेला चाहन्छ त्यतिवेला आफूलाई फोन गर्न सक्छ । उहाँले भन्नुभयो, “सबै कार्ड अमेरिकाको हातमा छ र उसले सबै कुरा जितेको छ ।” 

एक प्रस्तावको हवाला दिँदै राष्ट्रपति ट्रम्पले भन्नुभयो, “इरानले पहिले दिएको प्रस्ताव राम्रो थिएन ।”

 “उनीहरूले हामीलाई एउटा प्रस्ताव दिए जुन थप राम्रो हुनुपर्थ्यो त्यसैले मैले प्रतिनिधिमण्डल पठाउने कुरालाई रद्द गरेँ, तुरुन्तै ९१० मिनेट भित्र०, हामीले नयाँ प्रस्ताव पायौँ जुन धेरै राम्रो छ।” उहाँले पत्रकारहरूसँग भन्नुभयो । रासस