राससकर्मी श्रेष्ठसहित ४ जनालाई फोनिज मधेस प्रदेशले पुरस्कृत गर्ने  

बारा । नेपाल आदिवासी जनजाति पत्रकार महासङ्घ (फोनिज) मधेस प्रदेशले स्थापनाको अवसरमा पारेर राससकर्मी सत्यप्रसाद श्रेष्ठसहित ४ जना पत्रकारहरूलाई पुरस्कृत गर्ने भएको छ । 

क्रिएटिभ क्रियाशील पत्रकारिता पुरस्कार र देवनारायण गनिया स्मृति पत्रकारिता पुरस्कार  चार  जना पत्रकारलाई प्रदान गर्ने निर्णय गरेको छ । सञ्चार क्षेत्रमा लामो समयदेखि कार्यरत पत्रकार सत्य प्रसाद श्रेष्ठ र रिना आलेलाई देवनारायण गनिया स्मृति पत्रकारिता पुरस्कार प्रदान गर्ने निर्णय फोनिजले गरेको हो ।

श्रेष्ठ ४ दशक भन्दा बढी राससमा सक्रिय रुपमा काम गर्दै आउनुभएको छ । ७२ वर्षको उमेरमा पनि श्रेष्ठ उतिकै सक्रिय हुनुहुन्छ ।

त्यसैगरी, क्रिएटिभ क्रियाशील पत्रकारिता पुरस्कार लक्ष्मी चौधरी र डम्बर राईलाई प्रदान गर्ने निर्णय भएको हो । फोनिज मधेस प्रदेशका अध्यक्ष दुष्यन्त चौधरीको  संयोजकत्वमा गठित पुरस्कार छनौट समितिले पत्रकारहरू श्रेष्ठ, आले, राई र चौधरीलाई प्रदान गर्ने निर्णय गरेको फोनिज मधेस प्रदेशका महासचिव बृवमान तामाङले जानकारी दिनुभयो ।