अन्तर्राष्ट्रिय महिला फुटबल च्याम्पियनसिप: नेपाल र म्यानमाको खेल बराबरी

काठमाडौँ । चार देश सम्मिलित अन्तर्राष्ट्रिय महिला फुटबल च्याम्पियनसिप अन्तर्गत नेपाल र म्यानमाबीचको खेल बराबरीमा सकिएको छ । पहिलो हाफमा नेपाल र म्यानमाले २–२ गोलको बराबरी खेलेका हुन् । 

दशरथ रङ्गशालामा जारी खेलको छैटौँ मिनेटमा घरेलु दर्शकलाई स्तब्ध पार्दै म्यानमाले पहिलो गोल गरेको थियो । उक्त गोल म्यानमाका लागि फ्रि–किकमा म्याट नोइ खिनले गरेकी थिइन् । लगत्तै खेलको ११ औँ मिनेटमा नेपालका लागि सविता रानामगरले गोल गरिन् । 

यसैगरी खेलको १७औँ मिनेटमा म्यानमाले नेपालविरुद्ध दोस्रो गोल गर्‍यो । म्यानमाका लागि उक्त गोल मे टेट लुले गरेकी थिइन् । पहिलो हाफको अन्तिममा नेपालका लागि सावित्रा भण्डारी ‘साम्बा’ले गोल गरिन् । उनले खेलको ४१औँ मिनेटमा प्रीति राईको उत्कृष्ट पासमा गोल गरेकी थिइन् । योसँगै पहिलो हाफ २–२ गोलको बराबरीमा सकियो । 

पहिलो हाफपछि दुवै टिमले कुनै गोल गर्न सकेनन् ।