गौतमको निधनले राजनीतिक तथा सामाजिक क्षेत्रमा अपूरणीय क्षतिः मुख्यमन्त्री आचार्य

बाँके । लुम्बिनी प्रदेशका मुख्यमन्त्री चेतनारायण आचार्यले नेकपा एमालेका पूर्व केन्द्रीय सल्लाहकार तथा लुम्बिनी प्रदेश सभाका पूर्व सदस्य बाबुराम गौतमको निधनले राजनीतिक तथा सामाजिक क्षेत्रमा अपूरणीय क्षति पुगेको बताउनुभएको छ । 

गौतमको १३औँ दिनको पुण्यतिथिमा नेकपा एमाले बाँके जिल्ला कमिटीले सोमबार आयोजना गरेको श्रद्धाञ्जली सभालाई सम्बोधन गर्दै मुख्यमन्त्री आचार्यले गौतमलाई सादगीपूर्ण जीवनशैली, निष्ठापूर्ण राजनीतिक यात्रा र जनतामाझ लोकप्रिय व्यक्तित्वका रूपमा स्मरण गर्नुभयो । उहाँले गौतमप्रति सच्चा श्रद्धाञ्जली व्यक्त गर्ने माध्यम उहाँका विचार, सिद्धान्त र योगदानलाई व्यवहारमा निरन्तरता दिनु भएको बताउनुभयो ।

प्रदेश सभामा पाँच वर्षसम्म गौतमसँग सहकार्य गर्ने अवसर पाएको स्मरण गर्दै मुख्यमन्त्री आचार्यले उहाँलाई नजिकबाट चिन्ने र सिक्ने अवसर प्राप्त भएको बताउनुभयो । गौतमले आफूलाई सधैँ अभिभावकको रूपमा मार्गदर्शन गरेको उल्लेख गर्दै उहाँको राजनीतिक जीवन, सङ्घर्ष र समाजप्रतिको समर्पणबाट धेरै कुरा सिक्न सकिने बताउनुभयो । सङ्गठन निर्माण, विकास निर्माण तथा सामाजिक कार्यलाई अघि बढाउन उहाँले अतुलनीय भूमिका निर्वाह गर्नुभएको भन्दै मुख्यमन्त्री आचार्यले उहाँले देखाउनुभएको मार्गलाई निरन्तरता दिने प्रतिबद्धता व्यक्त गर्नुभयो ।

गुल्मीको थोर्गामा जन्मिएर बाँकेलाई कर्मथलो बनाउनुभएका गौतमले राजनीतिक तथा सामाजिक क्षेत्रमा पुर्‍याउनुभएको योगदान सधैँ स्मरणीय रहने मुख्यमन्त्री आचार्यको भनाइ थियो । उहाँले दिवङ्गत गौतमप्रति भावपूर्ण श्रद्धाञ्जली अर्पण गर्दै शोकसन्तप्त परिवारजन, आफन्त तथा शुभेच्छुकहरूमा समवेदना व्यक्त गर्नुभयो ।

नेकपा एमाले बाँके जिल्ला अध्यक्ष निरक गुरुङको अध्यक्षता तथा मुख्यमन्त्री आचार्यको प्रमुख आतिथ्यतामा सम्पन्न सभामा पार्टीका नेता तथा कार्यकर्ताहरूको सहभागिता रहेको थियो ।