कांग्रेस हल्लाले नभई सङ्घर्ष र त्यागबाट स्थापित पार्टी हो : महासचिव राई

काठमाडौँ । श्रम संस्कृति पार्टीका महासचिव आरेन राईले नेपाली कांग्रेस हल्लाका भरमा नभई लामो सङ्घर्ष र त्यागबाट स्थापित भएको पार्टी भएको बताउनुभएको छ।

नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै महासचिव राईले नेपालमा लोकतन्त्र र प्रजातन्त्र स्थापनाका लागि काँग्रेसले महत्वपूर्ण भूमिका खेलेको बताउनुभयो । “नेपाली कांग्रेसको इतिहास धेरै पढ्यौँ र हेर्‍यौँ। नेपाली कांग्रेस वास्तवमा हल्लाद्वारा स्थापित भएको पार्टी होइन”, उहाँले भन्नुभयो।

उहाँले कांग्रेसको इतिहासमा धेरै नेता तथा कार्यकर्ताले व्यक्तिगत सपना त्यागेर राष्ट्र निर्माणका लागि योगदान गरेको बताउनुभयो ।“आफ्ना निजी सपना मारेर, राष्ट्र निर्माणका निम्ति सपना त्यागेर, त्यो सपना देखेर निर्माण भएको पार्टी हो”, उहाँले भन्नुभयो।

महासचिव राईले काँग्रेसले आगामी दिनमा सत्तामा कति समय रहने भन्दा पनि जनताका पक्षमा कति राम्रो काम गर्न सकिन्छ भन्ने विषयलाई प्राथमिकतामा राख्नुपर्ने बताउनुभयो ।