जानकीमा गुणस्तरीय शिक्षातर्फ नयाँ पहल
बाँके। जानकी गाउँपालिका–३ स्थित नेपाल राष्ट्रिय कन्या माध्यमिक विद्यालयले शैक्षिक गुणस्तर अभिवृद्धि विषयमा आयोजना गरेको कार्यक्रमले स्थानीय तहमा शिक्षा सुधारसम्बन्धी नयाँ बहस सुरु गरेको छ । कार्यक्रममा जनप्रतिनिधि, शिक्षक, शिक्षा क्षेत्रका विज्ञ तथा सरोकारवालाहरूले गुणस्तरीय शिक्षाका लागि सबै पक्षको संयुक्त प्रयास आवश्यक रहेकोमा जोड दिएका छन् ।
कार्यक्रमलाई सम्बोधन गर्दै गाउँपालिकाका अध्यक्ष छब्बन खाँले गुणस्तरीय शिक्षाको आधार सक्षम, योग्य र उत्प्रेरित शिक्षक रहेको बताउनुभयो । उहाँले कन्या विद्यालय आधारभूत तहबाट माध्यमिक तहसम्म विस्तार हुनु उपलब्धिपूर्ण भएको उल्लेख गर्दै गुणस्तरमा कुनै कमी आउन नदिन शिक्षकहरूलाई निर्देशन दिनुभयो ।
अध्यक्ष खाँले शिक्षा समाज परिवर्तनको शक्तिशाली माध्यम भएको भन्दै यसले गरिबी, अशिक्षा र सामाजिक असमानता अन्त्य गर्न महत्वपूर्ण भूमिका खेल्ने बताउनुभयो । जानकी गाउँपालिका बहुल समुदायको क्षेत्र भएकाले समावेशी र सहज शिक्षा सुनिश्चित गर्नुपर्नेमा उहाँले जोड दिनुभयो ।
प्रमुख प्रशासकीय अधिकृत परशुराम उपाध्यायले विद्यालयलाई ‘स्मार्ट विद्यालय’ बनाउने लक्ष्यसहित करिब तीन करोड रुपैयाँ बजेट माग गरिएको जानकारी दिनुभयो । उहाँले “पढ्दै कमाउँदै” अवधारणालाई अघि बढाउनुपर्ने बताउँदै गुणस्तरीय शिक्षा सबै बालबालिकाको अधिकार भएको उल्लेख गर्नुभयो ।
शिक्षा शाखा प्रमुख कृष्णा कुमारी भण्डारीले कन्या विद्यालयको स्तरोन्नति ऐतिहासिक उपलब्धि भएको बताउँदै यसलाई नमूना विद्यालयका रूपमा विकास गर्नुपर्नेमा जोड दिनुभयो ।
शिक्षाविद् किरण आचार्यले गुणस्तरीय शिक्षालाई परीक्षा परिणाममा मात्र सीमित नराखी जीवनोपयोगी सीप, नैतिकता र स्वावलम्बनसँग जोड्नुपर्ने बताउनुभयो ।
कार्यक्रममा विद्यालयलाई माध्यमिक तहसम्म सञ्चालन गर्ने अनुमति पत्र पनि प्रदान गरिएको थियो । सरोकारवालाहरूले यसलाई छोरी शिक्षाको क्षेत्रमा महत्वपूर्ण कदमका रूपमा लिएका छन् ।
प्रतिक्रिया राख्नुहोस्