भेरी अस्पतालमा ३ महिनामा १८७ भिरिङ्गी प्रभावित भेटिए

नेपालगञ्ज । नेपालगञ्जस्थित भेरी अस्पतालमा सञ्चालन भइरहेको सिफलिस (भिरिङ्गी) सम्बन्धि वैज्ञानिक अनुसन्धानले तीन महिनामा महत्वपूर्ण तथ्याङ्क सङ्कलन गरेको छ । छाला तथा यौन रोग विशेषज्ञ डा. बद्री चापागाईँको नेतृत्वमा भइरहेको ‘भेनस अध्ययन २०२६’ अन्तर्गत ३२५ अस्पताल भिजिटको विवरण सङ्कलन गरिएको हो ।

सङ्कलित तथ्याङ्क अनुसार १८७ जना नयाँ सिफलिस प्रभावित ९युनिक केस० बिरामी पहिचान भएका छन् । यी मध्ये केहीलाई तत्काल उपचार आवश्यक रहेको छ भने केहीले यस अघि उपचार गराइसकेका बिरामी समेत समावेश छन् ।

अनुसन्धानले मुख्यतः २० देखि ४० वर्ष उमेर समूहका युवा बढी प्रभावित रहेको देखाएको छ । साथै, जन्मजात संक्रमण भएका शिशुदेखि ६५ वर्षसम्मका व्यक्तिमा समेत संक्रमण पुष्टि भएको छ । केही अवस्थामा आमाबाट बच्चामा संक्रमण सरेको (कन्जेनिटल ट्रान्समिसन) समेत भेटिएको छ ।

वैदेशिक रोजगारीका लागि गरिने अनिवार्य स्वास्थ्य परीक्षणका क्रममा ‘अनफिट’ ठहरिने सिफलिस सङ्क्रमितको संख्या पनि उल्लेख्य रहेको पाइएको छ । यौनाङ्गमा घाउ भएका १० भन्दा बढी बिरामी रेकर्डमा समावेश छन् भने करिब ३० प्रतिशत बिरामी पुरानो संक्रमण निको भए/नभएको जाँच गर्न अस्पताल पुगेका छन् ।

सेवा प्रवाहलाई थप प्रभावकारी बनाउन भेरी अस्पतालले छाला तथा यौन रोग विभाग अन्तर्गत  ‘भेनस कर्नर’ स्थापना गरेको छ । यहाँ सिफलिससम्बन्धि परामर्श, परीक्षण तथा उपचार सेवा सुरक्षित, गोप्य र व्यवस्थित रूपमा कोठा नं २२ बाट निःशुल्क उपलब्ध गराइएको छ ।

डा। चापागाईँका अनुसार सिफलिस सामाजिक व्यवहार, वैदेशिक रोजगारी, औषधिको अनियन्त्रित प्रयोग तथा नीतिगत कमजोरीसँग जोडिएको जटिल सार्वजनिक स्वास्थ्य समस्या हो । यस अध्ययनले उपचार प्रक्रियामा देखिएका चुनौती, स्वास्थ्यकर्मीमा रहेको भ्रम तथा बिरामीले भोग्ने सामाजिक लाञ्छनाबारे तथ्यगत जानकारी प्रदान गर्ने अपेक्षा गरिएको छ ।

अध्ययनबाट प्राप्त निष्कर्षले भविष्यमा राष्ट्रिय यौनजन्य रोग (एसटिआई) मार्ग निर्देशन तथा वैदेशिक रोजगारीसम्बन्धी स्वास्थ्य नीतिमा सुधार गर्न आधार तयार गर्ने विश्वास व्यक्त गरिएको छ । २०२६ जनवरी १ देखि सुरु भएको यो अध्ययन डिसेम्बर अन्तिमसम्म निरन्तर रहनेछ ।