गृहमन्त्री अर्यालद्वारा मतदान स्थलको अनुगमन

काठमाडौँ । गृहमन्त्री ओमप्रकाश अर्यालले काठमाडौँ निर्वाचन क्षेत्र नं ६ तारकेश्वर नगरपालिकाअन्तर्गत तारकेश्वर मतदान स्थलको अनुगमन तथा प्रहरी प्रधान कार्यालयमा निर्वाचन व्यवस्थापन सूचना केन्द्रको निरीक्षण गर्नुभएको छ ।

गृहमन्त्रीका साथ गृह सचिव राजकुमार श्रेष्ठ, सुरक्षा निकायका प्रमुख तथा काठमाडौँका प्रमुख जिल्ला अधिकारी ईश्वरराज पौडेललगायत सुरक्षा निकायका अधिकारीहरू हुनुहुन्थ्यो ।

मतदातासँग कुरा गर्दै गृहमन्त्रीले निर्वाचन सुरक्षाको सम्पूर्ण तयारी भइसकेकाले ढुक्क भएर मतदान गर्न मतदातालाई आग्रह गर्नुभयो । उहाँले निर्वाचन शान्तिपूर्ण, निष्पक्ष र व्यवस्थित रूपमा सम्पन्न गराउन सबै निकाय सतर्कतापूर्वक कार्यस्थलमा खटिएका बताउनुभयो । 

गृहमन्त्रीले मतदान केन्द्रको सुरक्षा व्यवस्था, मतदाताको सहज आवागमन तथा आवश्यक व्यवस्थापनबारे जानकारी लिनुभएको हो ।

गृहमन्त्रीलाई निर्वाचन व्यवस्थापन सूचना केन्द्रमा पालिका स्तरसम्म जनशक्ति व्यवस्थापन एवं परिचालन, निर्वाचनमा खटिएका सबैको एकीकृत सूचना निर्वाचन प्रहरी, मतदान स्थल र मतपेटिकाको अवस्था, मतगणना उम्मेदवारको विवरण प्राप्त गर्न सकिनेबारे जानकारी गराइएको थियो । मतदान स्थल र मतपेटिकाको अवस्थाको स्थलगत र सङ्ख्यात्मक अवस्थाबारे जानकारी लिइनेछ । 

प्रहरी महानिरीक्षक दानबहादुर कार्कीले केन्द्रबारे जानकारी दिनुभएको थियो । केन्द्रबाट मतदान स्थलमा मतपेटिका पुगे/नपुगेको, मतदान प्रक्रिया प्रारम्भ भए/नभएको सूचना सहजै प्राप्त गर्ने व्यवस्था मिलाइएको उहाँले जानकारी दिनुभयो । देशभरका सबै निर्वाचन क्षेत्रका निर्वाचन गतिविधिको सहज रूपमा अनुगमन गर्न सकिन्छ । केन्द्रमा ४१ वटा रियल टाइम भिडियो क्यामेरा जडान गरिएको छ । 

गृहमन्त्री अर्यालले सात वटै प्रदेशमा परिचालन भएका सुरक्षाकर्मी तथा निर्वाचन ‘डेस्क’का सुरक्षाकर्मीबारे जानकारी लिनुभएको थियो ।