असहाय बालबालिका पढाउँदै रोङ गाउँपालिका 

इलाम । इलामको रोङ गाउँपालिकाले असहाय बालबालिकालाई  शिक्षा, स्वास्थ्य र पालनपोषण गर्ने भएको  छ ।  

अभिभावक विहीन भएका बालबालिकाहरूको सहारा बन्ने निर्णय गरेसँगै परिवार विहीन २१ जना बालबालिकाको शिक्षा, स्वास्थ्य र पालन पोषणको जिम्मा गाउँपालिकाले लिएको गाउँपालिका अध्यक्ष मनिकुमार स्याङ्बोले बताउनुभयो  ।

अभिभावक बुवाआमा नहुँदा बालबालिकाको जीवन कष्टकर हुन्छ उनीहरूले संविधानमा उल्लेख भएको मौलिक हक  शिक्षा गाँसबास समेत पाउन सकेका हुँदैनन् यही कुरालाई ध्यानमा राखेर २१ असहाय बालबालिकाहरूलाई कक्षा १२ सम्मको अध्ययनको सम्पूर्ण खर्च गाउँपालिकाको अक्षयकोषबाट बेहोरिने अध्यक्ष स्याङबोले प्रस्ट पार्नुभयो । अध्यक्षसँग विद्यार्थी कार्यक्रम अन्तरगत अभिभावक विहीन विद्यार्थीहरूका लागि  गाउँपालिकाले अभिभावकत्व ग्रहण गरेको उहाँको भनाई छ ।

प्रमुख प्रशासकीय अधिकृत विनोद चौहानले कोही नहुनेलाई अब सरकारले हेर्छ भन्ने नारा रोङबाट शुरु भएको बताउनुभयो  ।   अभिभावक विहीन र असहाय विद्यार्थीको प्रतिव्यक्ति ५ लाखको दुर्घटना बिमा गाउँपालिकाले गरेको छ भने उनीहरूको स्वास्थ्य उपचारका लागि हरेक वर्ष १ लाखको स्वास्थ्य बिमा गर्नेछ । असहाय बालबालिकाको लागि आवश्यक  खर्च व्यवस्थापन गर्न गाउँपालिकाले कोष नै बनाएको  उपाध्यक्ष विष्णुमाया भुजेलले जानकारी दिनुभयो ।

कोषमा गाउँपालिकाले प्रति विद्यार्थी १० हजार र सिद्धि हाइड्रोपावरबाट प्रति विद्यार्थी २० हजारको दरले रकम जम्मा भएको पालिकाले जनाएको छ । रोङ गाउँपालिकामा २१ जना अभिभावक विहीन र १७ जना असहाय विद्यार्थी रहेको तथ्याङ्क छ ।

 गाउँपालिकाले कानुन नै बनाएर जोखिममा परेका विद्यार्थीको अभिभावकत्व लिएपछि पालिकाका असहाय बालबालिकामा खुशि छाएको छ भने उनीहरूको शिक्षाको ज्ञारेन्टी तथा जीवन सुरक्षित भएको छ ।