शुक्रबारदेखि पोखरामा आठौँ इक्यान एजुकेसन फेयर हुने

पोखरा । पोखरामा शुक्रवार देखि ‘आठौँ इक्यान एजुकेसन फेयर’ हुने भएको छ । नेपाल शैक्षिक परामर्श सङ्घ (इक्यान) कास्की शाखाको आयोजनामा शनिवारसम्म पोखराको न्युरोड स्थित सिटी स्क्वायर बैंक्वेटमा उक्त मेला हुने भएको हो ।

लामो समयदेखि आयोजना हुन नसकेको गण्डकी प्रदेशको सबैभन्दा ठुलो शैक्षिक मेला यस वर्ष नेपाल सरकार, शिक्षा, विज्ञान तथा प्रविधि मन्त्रालय, शैक्षिक परामर्श तथा प्रमाणीकरण शाखाबाट अनुमति लिएर इक्यान कास्कीले आठौँ संस्करण आयोजना गर्न लागेको हो । मेलामा अमेरिका, अस्ट्रेलिया, क्यानडा, बेलायत लगायतका कलेज एवं विश्वविद्यालयका प्रतिनिधि, इक्यानका सदस्य संस्था, ब्रिटिस काउन्सिल लगायतका ६५ स्टल रहने भएको इक्यान कास्कीका उपाध्यक्ष एवं मेला संयोजक सन्तोष शाहीले बताउनु भयो । मेलामा सहभागी विद्यार्थीलाई लक्की ड्र मार्फत ल्यापटप, ट्याब, मोबाइल, मुभी टिकट लगायत आकर्षक उपहार प्रदान गरिने भएको छ । 

इक्यान कास्कीका अध्यक्ष ओमप्रकाश गैह्रेले गण्डकी प्रदेशका विद्यार्थीलाई लक्ष्य गरेर नेपाल सरकारबाट स्वीकृतप्राप्त कन्सल्टेन्सी मात्रै शैक्षिक मेलामा सहभागी हुने बताउनु भयो । उहाँले भन्नुभयो, ‘विश्व ग्लोबल भिलेजका रूपमा परिवर्तित भइरहेको वर्तमान परिवेशमा नेपाली विद्यार्थीले आफूले चाहेको विषय, संसारका जुनसुकै कुनामा रहेका कलेज, विश्वविद्यालयमा उच्च शिक्षा हासिल गर्न पाउनु उहाँहरूको नैसर्गिक अधिकारको कुरा हो ।’ 

इक्यान कास्कीका उपाध्यक्ष एवं मेला संयोजक सन्तोष शाहीले पोखरामै अन्तर्राष्ट्रिय विश्वविद्यालय र कलेजको उपस्थितिमा हुने शैक्षिक मेलाले विदेशमा पढ्न इच्छुक विद्यार्थीका लागि एकै थलोमा परामर्शको अवसर प्रदान गर्ने बताउनु भयो । उहाँले भन्नुभयो, ‘मेलामा आएपछि आफ्नो रोजाइ र क्षमता अनुसारका विश्वविद्यालय वा कलेजमा छान्न पाउने अवसर विद्यार्थीलाई मिल्ने छ ।’ 

इक्यानका केन्द्रीय उपाध्यक्ष भुवनबहादुर क्षेत्रीले नेपालभर हाल ७ सय २० कन्सल्टेन्सी नेपाल सरकारको शिक्षा मन्त्रालयमा सूचीकृत भएको जानकारी दिँदै ती कन्सल्टेन्सीबाट विश्वसनीय सेवा लिन सकिने बताउनु भयो । इक्यानका सदस्यले विद्यार्थीलाई विदेश पठाउने मात्र नभई अध्ययन पश्चात् नेपाल फर्काउने अभियान पनि सञ्चालन गरिरहेको उहाँले बताउनु भयो । ‘अवसरको खोजी गर्ने मानवीय स्वभाव नै हो,’ उहाँले भन्नुभयो, ‘यद्यपि इक्यानले नेपाल फर्काउने अभियान चलाउन अर्को शैक्षिक मेला छिट्टै आयोजना गर्दैछ ।’    

मेलामा ब्रिटिस काउन्सिल नेपालको सहकार्य रहनेछ । मेलाको पावर्ड बाइमा बेलायत स्थित युनिभर्सिटी अफ वर्केस्टर र योर्क सेन्ट जोन युनिभर्सिटी रहेका छन् । मेलाको प्लाटिनम प्रायोजकमा ग्रेस इन्टरनेसनल, गोल्ड प्रायोजकमा चर्चिल इन्स्टिच्युट अफ हाइयर एजुकेसन/आईआईई र बैङ्किङ पार्टनरमा एनएमबी बैङ्क रहेका छन् । पर्यटकीय राजधानी पोखरामा हुन लागेको बृहत् शैक्षिक मेलामाबाट यस क्षेत्रका विद्यार्थी, अभिभावक तथा अन्य सरोकारवालाले लाभ लिन सक्ने इक्यान कास्कीले जनाएको छ । यसैबिच, उक्त मेलाको शुक्रवार सामाजिक विकास, युवा तथा खेलकुद मन्त्री विन्दुकुमार थापाले उद्घाटन गर्नु हुने भएको छ ।