महिलाहरूलाई आत्मविश्वासी बनेर समाज परिवर्तनको नेतृत्व लिन पूर्व राष्ट्रपति भण्डारीको आह्वान 

वीरगन्ज । पूर्व राष्ट्रपति विद्यादेवी भण्डारीले महिलाहरूलाई आत्मविश्वासी बनेर समाज परिवर्तनको नेतृत्व लिन आह्वान गर्नुभएको छ ।

वीरगन्ज उद्योग वाणिज्य सङ्घद्वारा आयोजित ‘बृहत् महिला सम्मेलन–२०८२’ को उद्घाटन समारोहलाई सम्बोधन गर्दै उहाँले महिलाको उद्यमशीलता देशको आर्थिक समृद्धिसँग जोडिएको बताउनुभयो ।

पूर्व राष्ट्रपति भण्डारीले वीरगन्जजस्तो व्यापारिक केन्द्रमा महिलाको सक्रिय सहभागिता केवल व्यक्तिगत सफलता नभई सिङ्गो देशको अर्थतन्त्र बलियो बनाउने प्रक्रियाको हिस्सा भएको उल्लेख गर्नुभयो । 

समाजमा अझै कायम रहेका लैङ्गिक असमानता, पूर्वाग्रह र अवरोधहरूबारे टिप्पणी गर्दै उहाँले महिलाहरूलाई ती संरचनालाई तोड्ने आत्मबल आवश्यक रहेको बताउँदै भण्डारीले महिलालाई नेतृत्वदायी भूमिकामा अघि सर्न आग्रह गर्नुभयो । 

पूर्व राष्ट्रपति भण्डारीले नेपालको समृद्धिको बाटो प्राकृतिक स्रोत, जनशक्ति र सांस्कृतिक विविधताको विवेकपूर्ण उपयोगमा रहेको उल्लेख गर्दै स्वदेशी उत्पादनमा आधारित अर्थतन्त्र निर्माणमा महिलाको भूमिका महत्त्वपूर्ण हुने बताउनुभयो । 

कृषिमा आधारित उद्योग, जडीबुटी, आयुर्वेद, साना तथा मझौला उद्योग, पर्यटन र सूचना प्रविधि क्षेत्रको प्रवर्द्धन आवश्यक रहेको उहाँले औँल्याउनुभयो । 

परिवारदेखि उद्योग, शिक्षा, स्वास्थ्य र सामाजिक परिवर्तनसम्म महिलाको योगदान महत्त्वपूर्ण रहेको उल्लेख गर्दै पूर्व राष्ट्रपति भण्डारीले त्यो योगदान अझै पर्याप्त नभएको टिप्पणी गर्नुभयो ।

कार्यक्रममा वीरगन्ज उद्योग वाणिज्य सङ्घका अध्यक्ष हरि गौतमले नारीहरू अझै पनि विविध कठिनाइ र विभेदको सामना गरिरहेको उल्लेख गर्दै यो सम्मेलनले उनीहरूको आवाज बुलन्द गराउने विश्वास व्यक्त गर्नुभयो ।

सङ्घको महिला उद्यमशीलता विकास समितिकी सभापति डा. लक्ष्मी गुप्ताको अध्यक्षतामा सम्पन्न कार्यक्रममा विभिन्न क्षेत्रबाट योगदान पुर्‍याएका २५ जना महिलाहरूलाई प्रमुख अतिथि भण्डारीले दोसल्ला र सम्मान पत्रद्वारा सम्मान गर्नुभएको थियो ।