वीरगन्जका सबै विद्यालय थप तीन दिनका लागि बन्द हुने

वीरगन्ज । वीरगन्ज महानगरपालिकाभित्र हैजाको सङ्क्रमण नियन्त्रणमा नआएपछि महानगरपालिकाले सम्पूर्ण सामुदायिक तथा संस्थागत विद्यालयहरू थप तीन दिनका लागि बन्द गर्ने निर्णय गरेको छ । 

बढ्दो जोखिमलाई ध्यानमा राख्दै भाद्र १५ गतेदेखि १७ गतेसम्मका लागि सबै विद्यालयहरू बन्द गरिएका हुन् । यसअघि महानगरले भदौ ११–१३ सम्म सामुदायिक र संस्थागत विद्यालयहरूको पठनपाठन स्थगित गरेको थियो । 

हैजाको सङ्क्रमण फैलन नदिन महानगरपालिकाले विशेष सावधानी अपनाउन सबैलाई आग्रह गरेको छ । यस अवधिमा विद्यार्थीहरूलाई भिडभाड हुने ठाउँमा नजान, व्यक्तिगत सरसफाइमा विशेष ध्यान दिन र सुरक्षित तथा शुद्ध खानेपानी मात्र प्रयोग गर्न आग्रह गरिएको छ ।

महानगरपालिकाले अभिभावक र विद्यालय व्यवस्थापनलाई यस स्वास्थ्य सङ्कटको बेला आफ्ना बालबालिकालाई सुरक्षित राख्न आवश्यक सहयोग गर्न अनुरोध गरेको छ ।