‘नेपाल–भारत समस्याको समाधान आपसी समन्वयमा हुनुपर्छ’

वीरगन्ज । कानुन न्याय तथा संसदीय मामिला मन्त्री अजय कुमार चौरसियाले नेपाल भारतको समस्या साझा समस्या भएकाले यसको समाधान आपसी हितमा दुवै मुलुकको समन्वय तथा सहकार्यमा हुनुपर्ने बताउनुभएको छ ।

मिडिया फोर बोर्डर हारमोनि नेपाल, वीरगन्जले आयोजना गरेको नेपाल भारत क्रस बोर्डर सम्मेलनको आज वीरगन्जमा उद्घाटन गर्दै मन्त्री चौरसियाले नेपाल भारतको सम्बन्ध राजनीतिक सम्बन्धमा मात्र आधारित नभई व्यक्ति व्यक्तिबिचको सामूहिक सम्बन्ध रहेकोले यसको समाधान आपसी सहयोगमा आधारित रहेको बताउनुभयो ।

उहाँले नेपालका लोकतान्त्रिक नेताहरू बिपी कोइराला गणेशमान सिंह, कृष्णप्रसाद भट्टराई, सुवर्ण समशेर लगायतका नेताहरू भारतीय भूमिमा आप्रवासीको रूपमा रहेर भारतीय स्वतन्त्रता आन्दोलनमा र भारतीय नेताहरू डा . राममनोहर लोहिया जयप्रकाश नारायण चन्द्रशेखर जस्ता लोकतान्त्रिक नेताहरूले नेपालमा लोकतन्त्र स्थापनाका लागि खेलेको भूमिकाले राजनीतिक सम्बन्धमा थप उचाइ थपिएको बताउनुभयो ।

कार्यक्रममा मधेस प्रदेशसभा सदस्य श्याम पटेलले सत्य तथ्य समाचारले मात्र दुई मुलुकको सम्बन्धलाई अझ प्रगाढ बनाउने भएकोले समाचार सम्प्रेषण गर्दा दुवै मुलुकको हितलाई ध्यानमा राखी भ्रम फैलाउने खालका समाचार सम्प्रेषण नगर्न आग्रह गर्नुभयो । 

कार्यक्रममा पूर्व राजदूत विजयकान्त कर्ण, नेपाल पत्रकार महासङ्घका सचिव अशोक तिवारी, वरिष्ठ पत्रकार हस्त गुरुङ र अनिल तिवारी, भारतीय पत्रकार अमरेन्द्र तिवारी र विवेक चन्द्रले नेपाल भारतको सम्बन्ध तथा पत्रकारिताको भूमिकाका विषयमा आफ्ना भनाई राख्नुभएको थियो ।

सम्मेलनमा नेपालबाट ४० र भारतको ५१ जना पत्रकारको सहभागिता रहेको छ ।