प्रधानमन्त्री ओलीद्वारा चिन भ्रमणबारे सदनलाई जानकारी
काठमाडौँ । प्रधानमन्त्री केपी शर्मा ओलीले भोलीदेखि हुने चीन भ्रमणको विषयमा सदनमा जानकारी गराउनुभएको छ ।
प्रधानमन्त्री ओली मित्र राष्ट्र जनवादी गणतन्त्र चीनका राष्ट्रपति सी चिनफिङको मैत्रीपूर्ण निमन्त्रणमा नेपाली प्रतिनिधिमण्डलको नेतृत्व गर्दै यही भदौ १८ गतेसम्म हुने ५ दिने भ्रमणका लागि भोली चीन प्रस्थान गर्ने कार्यक्रम रहेको छ ।
प्रधानमन्त्री ओली चीनको थियानजिन शहरमा आयोजना हुने शाङ्घाई सहयोग सङ्गठन (शाङ्घाइ कोअपरेशन अर्गनाइजेशन) को शिखर सम्मेलनमा भाग लिन चीन जान लाग्नुभएको हो ।
उहाँले भ्रमणबाट नेपाल र जनवादी गणतन्त्र चीनबीचको मैत्रीपूर्ण द्विपक्षीय सम्बन्ध थप सुदृढ हुनुका साथ एससिओ शिखर सम्मेलनमा आफ्नो सहभागिताले अन्तर्राष्ट्रिय मञ्चमा विभिन्न समसामयिक विषयमा नेपालको अवधारणा एवं प्राथमिकताको प्रस्तुतिबाट मुलुकको छवि एवं प्रतिष्ठा अभिवृद्धि हुने विश्वास लिएको प्रधानमन्त्री ओलीले बताउनुभयो ।
उहाँले भ्रमणका क्रममा चीनका राष्ट्रपति सी चिनफिङसँग दुई पक्षीय भेट हुने, बेइजिङमा चीनका उपराष्ट्रपति हान चङ्गसँग भेट हुने र चीनका राष्ट्रपति र उपराष्ट्रपतिले दिने छुट्टाछुट्टै रात्रि भोजमा समेत सहभागी हुने जानकारी गराउनुभयो ।
प्रधानमन्त्री ओलीले भदौ १६ गते थियानजिनमा हुने एससिओ प्लस शिखर सम्मेलनमा सहभागी भई सम्बोधन गर्ने कार्यक्रम रहेको जानकारी गराउनुभयो ।
प्रधानमन्त्री ओलीले एससिओ शिखर सम्मेलनका दौरान विभिन्न मित्रराष्ट्रहरूका राष्ट्र तथा सरकार प्रमुखहरूसँग द्विपक्षीय भेटवार्ता गर्ने कार्यतालिका रहेको र ती भेटघाटमा द्विपक्षीय एवं अन्य प्राथमिकताका विषयमा छलफल हुने बताउनुभयो ।
चीन भ्रमणका क्रममा विश्वका नेताहरूसँगै नेपाली प्रतिनिधि मण्डल चीन सरकारद्वारा बेइजिङमा आयोजना हुने फासिवाद विरुद्धको विश्वयुद्ध र जापानी अतिक्रमण विरुद्धको चिनियाँ जनताको प्रतिरोधी युद्धमाथिको विजयको ८० औँ वार्षिकोत्सव समारोहमा सहभागी हुने जानकारी समेत गराउनुभयो ।
प्रधानमन्त्री ओलीको भ्रमण दलमा प्रथम महिला राधिका शाक्य, पूर्व उपप्रधानमन्त्री एवं प्रतिनिधिसभाका सदस्य पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री एवम् प्रधानमन्त्रीको आर्थिक तथा विकास सल्लाहकार डा. युवराज खतिवडा, पूर्वमन्त्री एवम् प्रतिनिधि सभाका सदस्य छविलाल विश्वकर्मा र नेपाल सरकारका उच्चपदस्थ कर्मचारीहरू रहनुभएको छ ।
प्रतिक्रिया राख्नुहोस्