३१ औँ आदिवासी दिवस विविध कार्यक्रम गरि मनाइँदै 

काठमाडौँ ।  ‘आदिवासी जनजाति कृत्रिम बौद्धिकता: अधिकारको रक्षा र भविष्यको निर्माण’ भन्ने नारा सहित ३१ औँ अन्तर्राष्ट्रिय आदिवासी दिवस मनाइरहेको छ ।

शनिबार दिवसको अवसरमा नेपाल आदिवासी जनजाति महासङ्घको नेतृत्वमा काठमाडौँमा झाँकीसहितको र्‍याली निकालिएको थियो । गुरुङ, मगर, थारू, नेवार, तामाङ, राई र लिम्बूलगायत जातीय संस्थाहरूले आफ्नो ब्यानर र्‍याली निकालेका छन् । र्‍यालीमा सहभागीहरू परम्परा पोशाकमा सजिएका छन् । भृकुटीमण्डपबाट निकालिएको र्‍याली भद्रकाली, रत्नपार्क हुँदै राष्ट्रिय सभागृह पुगेर मूल समारोहमा परिणत भएको छ ।

हरेक वर्षको अगस्ट ९ तारिखका दिन मनाइने यस दिवसले विश्वभरका आदिवासी जनजाति समुदायको मौलिक हक र साँस्कृतिक मूल्यमान्यता रक्षाका लागि विशेष ध्यानाकर्षण गर्दै आइरहेको छ । सन् १९९४ मा संयुक्त राष्ट्र महासङ्घले आदिवासी समुदायको समृद्ध संस्कृति, विशिष्ट पहिचान र योगदानको सम्मान स्वरूप दिवस मनाउने निर्णय गरेको थियो । संयुक्त राष्ट्र महासभामा सन् १९८२ मा बसेको आदिवासी जनजाति समुदायको पहिलो बैठकको सम्झनास्वरुप अगस्ट ९ लाई विश्व आदिवासी दिवसको रुपमा मनाउँदै आएको छ ।

विविध कारणले समृद्धिको मुल मार्गमा आउन नसकेका आदिवासी जनजाति समुदायको राजनीतिक, साँस्कृतिक,शैक्षिक र आर्थिक अधिकार स्थापनाका लागि अभियन्ताहरूले निरन्तर आफ्नो आवाज प्रस्तुत गर्दै आइरहेका छन् । 

आदिवासी जनजाति समुदायको मौलिक हक,अधिकार स्थापना र उनीहरूको संस्कृतिको संरक्षण स्वरूप विश्वभर विभिन्न कार्यक्रम गरि यस दिवस मनाइरहेको छ  । 

संयुक्त राष्ट्र महासङ्घको आदिवासी समुदायको अधिकारसम्बन्धी घोषणा (UNDRIP) को अन्तर्राष्ट्रिय सम्झौता (ILO169 ) कार्यान्वयनका लागि अनुमोदन भइसकेको भए पनि आत्मनिर्णय र सामूहिक अधिकार सम्बन्धि अधिकार कार्यान्वयनको अवस्था अपुरो रहेको सन्दर्भमा नेपालमा आदिवासी अधिकारको अर्थपूर्ण औचित्यको खोजी भइरहेको छ ।