प्रचण्ड गर्मीसँगै मध्य तराईको जनजीवन प्रभावित

बीरगंज। विगत केही दिन देखि यता बढेको प्रचण्ड गर्मीको कारण बारा, पर्सा सहित मध्य तराईको जनजीवन नराम्रोसँग प्रभावित भएको छ । 

बीरगंजमा आज ४० डिग्री सेल्सियस सम्म पुगेको छ । गर्मी बढ्दै गएपछि दिउँसो हिड्डुल गर्ने सर्वसाधारण , काम गर्ने मजदुर तथा कृषि कर्म गर्ने किसानहरू बढी प्रभावित भएका छन् । प्रचण्ड गर्मीसँगै खानेपानीका धारा सुकेपछि बीरगंज सहित बारा, पर्साको ग्रामीण क्षेत्रमा खानेपानीको समस्या समेत परेको छ । अत्यधिक गर्मीको कारण पर्साका ग्रामीण क्षेत्रमा रहेका विद्यालयमा पङ्खाको सुविधा समेत नहुँदा विद्यार्थीको स्वास्थ्यमा असर पर्न थालेको छ । 

पछिल्लो समय बढेको गर्मीमा कक्षा कोठामा पङ्खा नहुँदा विद्यार्थीहरू बेहोस हुन् थालेका छन् । विशेष गरी स–साना बालबालिकाहरू गर्मीको कारण प्रभावित भएपछि पर्साका स्थानीय तहले निजी तथा सामुदायिक विद्यालयलाई एक साताका लागि बर्से बिदाबाट कट्टी हुने गरी बिदा दिनु पर्ने माग अभिभावकहरूको छ ।

त्यसैगरी प्रचण्ड गर्मीको कारण स–साना बालबालिकाहरू प्रभावित भएपछि बाराको कलैया उपमहानगरपालिकाले ३ दिन विद्यालय बिदा दिने निर्णय गरेको छ ।

उपमहानगरपालिका अन्तर्गतका विद्यालयहरूमा अत्यधिक गर्मीका कारण बालबालिकाहरू बेहोस हुन थालेपछि नगर शिक्षा समितिले तीन दिनका लागि विद्यालय बन्द गर्ने निर्णय गरेको हो । जेठ २७ गतेको निर्णयअनुसार, २०८२ जेठ २८ गतेदेखि २०८२ जेठ ३० गतेसम्म विद्यालयहरू बन्द रहनेछन् । यो बिदा वार्षिक बिदाबाट कटौती गरिनेछ ।

उपमहानगरको शिक्षा, युवा तथा खेलकुद महाशाखा प्रमुख राजीव कुमार यादवले जारी गरेको सूचनामा विद्यार्थीहरूको स्वास्थ्यमा पर्न सक्ने प्रतिकूल असरलाई मध्यनजर गर्दै यो निर्णय गरिएको उल्लेख छ ।

विद्यालयहरू २०८२ असार १ गते आइतबारदेखि नियमित रूपमा सञ्चालनमा आउनेछन्। केही दिनदेखि बढेको अत्यधिक गर्मीले बालबालिकाहरूको पठनपाठनमा समस्या हुँदै आएको थियो । मङ्गलवार एक्कासी विद्यालयका विद्यार्थीहरू बेहोस हुन थालेपछि उपमहानगरपालिकाले विद्यालय बिदा दिने निर्णय गरेको हो ।