दार्चुलामा यो वर्ष गहुँ उत्पादनमा वृद्धि

दार्चुला । गत वर्षको तुलनामा यस वर्ष दार्चुलामा गहुँ उत्पादनमा सामान्य वृद्धि भएको छ ।

गत वर्षको तुलनामा यस वर्ष दार्चुलामा १.९३ प्रतिशतले गहुँ उत्पादनमा वृद्धि भएको कृषि ज्ञानकेन्द्र दार्चुलाका कार्यालय प्रमुख सिद्दराज उपाध्यायले जानकारी दिनुभयो । 

दार्चुलामा गत वर्ष ११ हजार ३ सय ५० मेट्रिक टन गहुँ उत्पादन भएकोमा यसवर्ष ११ हजार ४ सय ९३ मेट्रिक टन गहुँ उत्पादन भएको उहाँले बताउनुभयो । दार्चुलामा खेतियोग्य जमिनमध्ये ५ हजार ९ सय ५५ हेक्टर क्षेत्रमा मात्रै गहुँ खेती गरिएको थियो ।

गहुँ उत्पादनको क्षेत्र बढेपनी यस वर्ष समयमै हिउँदे वर्षा नहुँदा अनुमान गरे जति उत्पादन नभएको बताइएको छ । त्यस्तै परम्परागत बिउँको प्रयोग, कृषि जनशक्तिको अभाव, रोग तथा किराहरूको संक्रमण, सिचाई समस्याले अनुमान गरे जति उत्पादन नभएको उहाँले बताउनुभएको छ । दार्चुलामा २९ हजार ५ सय ४४ हेक्टर जमिन खेतियोग्य रहेकोमा २२ हजार ८ सय २५ हेक्टरमा मात्रै खेतीपाती गर्ने गरिएको छ ।

खेतियोग्य जमिनमध्ये ३३ प्रतिशतमा मात्रै सिचाइको सुविधा रहेको कृषि ज्ञानकेन्द्र दार्चुलाका सहायक कृषि अर्थ विज्ञ स्यामराज जोशीले जानकारी दिनुभयो । जिल्लाका अधिकांश स्थानमा आकासेपानीको भरमा हिउँदे खेती गर्नुपर्ने भएकाले उत्पादनमा कमी आउने गरेको उहाँले बताउनुभयो ।