कर्णालीबाट श्रम स्वीकृति लिने बढे

सुर्खेत । कर्णाली प्रदेशको राजधानी सुर्खेतमा श्रम तथा रोजगार कार्यालय खुलेपछि वैदेशिक रोजगारीमा जाने श्रमिकलाई सहज भएको छ । 

श्रम तथा रोजगार कार्यालय सुर्खेतमा स्थापना भएपछि श्रम स्वीकृतिका लागि काठमाडौँ जानुपर्ने बाध्यताको अन्त्यसँगै श्रमिकलाई सहज भएको हो । कार्यालयका अनुसार चाल आर्थिक वर्षको पछिल्लो नौ महिनामा सुर्खेतबाट १३ हजार ३ सय १४ जनाले श्रम स्वीकृति लिएका छन् । ती मध्य ५ हजार ९ सय ६१ जनाले पुनः श्रम स्वीकृति लिएका छन् भने ७ हजार ३ सय ५३ जनाले व्यक्तिगत श्रम स्वीकृति लिएका हुन् । 

श्रम कार्यालयका प्रमुख (वरिष्ठ श्रम अधिकृत) हरिप्रसाद देवकोटाका अनुसार कर्णालीबाट गत आर्थिक वर्ष २०८०÷०८१ मा कुल ११ हजार ४८ जनाले श्रम स्वीकृति लिएका थिए । ती मध्य ५ हजार २ सय ४७ जनाले पुनः श्रम स्वीकृति र ५ हजार ८ सय १ जनाले व्यक्तिगत श्रम स्वीकृति लिएको उहाँले जानकारी दिनु भयो । उहाँले चालु आर्थिक वर्षको पछिल्लो नौ महिनामा कार्यालयले ५० वटा व्यवसायजन्य स्वास्थ्य तथा सुरक्षा सम्बन्धि निरीक्षण गरिएको बताउनु भयो । 

सोही अवधिमा कर्णालीका १ सय ७३ वटा व्यावसायिक फर्म तथा प्रतिष्ठानलाई सामाजिक सुरक्षा कोषमा दर्ता हुन निर्देशन दिइएको उहाँको भनाइ छ । कार्यालयले पछिल्लो नौ महिनामा २ सय २ वटा व्यावसायिक प्रतिष्ठानमा न्यूनतम पारिश्रमिक दिए/नदिएको अनुगमन गरिएको कार्यालयका श्रम अधिकृत श्रीसमशेर रानाले बताउनु भयो । उहाँले व्यावसायिक प्रतिष्ठानमा अनुगमन कडाइ गरिएपछि ६९ वटा व्यावसायिक प्रतिष्ठानलाई श्रम अडिट गर्न निर्देशन दिएको जानकारी दिनु भयो । 

उहाँका अनुसार हालसम्म कर्णालीका १ सय ९२ वटा व्यावसायिक प्रतिष्ठानले श्रम अडिट कार्यालयमा पेश गरेका छन् । कार्यालयका सूचना अधिकारी हेमन्त चुनाराले कर्णालीका ९० वटा व्यावसायिक प्रतिष्ठानलाई बैङ्किङ प्रणाली मार्फत कारोबारको भुक्तानी गर्न निर्देशन दिएको बताउनु भयो । उहाँका अनुसार हालसम्म कर्णालीमा ९८ वटा व्यावसायिक प्रतिष्ठानले बैङ्किङ प्रणाली मार्फत कारोबारको भुक्तानी गरिरहेका छन् । 

यसैबीच कार्यालयको उद्योग शाखाले चालु आर्थिक वर्षको पछिल्लो नौ महिनामा कर्णालीका २ सय २ वटा उद्योग प्रतिष्ठानको निरीक्षण तथा अनुगमन गरेको छ । कार्यालयले यसबीच ३ पटक श्रमिक शिक्षा सम्बन्धि जनचेतनामूलक कार्यक्रम गरेको जनाएको छ ।