बालविवाहलाई पूर्ण रुपमा बन्द गर्न थारु आयोगद्वारा ६ बुँदे प्रतिबद्धता घोषणा
बाँके । बालविवाहलाई पूर्ण रुपमा बन्द गर्न थारु आयोगले ६ बुँदे प्रतिबद्धता घोषणा गर्दै बृहत् अन्तरक्रिया र छलफल कार्यक्रम सम्पन्न गरेको छ ।
थारु आयोगले प्लान ईन्टरनेसनल नेपालसँगको सहकार्य र बाँके युनेस्को क्लब तथा अन्य संघ संस्थाहरूसँगको समन्वयमा बर्दियाको गुलरियामा आयोजना गरेको बालविवाह न्युनिकरणका लागि बरघरहरुको भूमिका विषयक अन्तरक्रिया कार्यक्रममा व्यापक छलफलपछि ६ बुँदे प्रतिबद्धता घोषणा गरिएको हो ।
कार्यक्रमको समापनमा आयोगले घोषणा गरेको प्रतिवद्धताहरुमा बालविवाहलाई कुनै पनि हालतमा स्वीकार नगर्ने, बालविवाह विरुद्ध व्यापक जनचेतना अभिवृद्धि गर्ने, बालविवाह विरुद्धका नीति, नियमहरूलाई कार्यान्वयन गर्न सम्बन्धित निकायमा पैरवी गर्ने र बालविवाह न्यूनीकरणको विषय बरघर ऐनमा समावेश गरी बरघरलाई अधिकार तथा श्रोत साधन सम्पन्न बनाउन पहल गर्ने रहेको बाँके युनेस्को क्लबका अध्यक्ष रवि तुलाधरले बताउनुभयो ।
सोही प्रकारले बरघरहरुले एकजुट भई बालविवाह विरुद्ध विभिन्न अभियान तथा कार्यक्रम सञ्चालन गर्ने, विवाहको उमेर २० बर्ष नै कायम राख्नकालागि निरन्तर वकालत गर्ने प्रतिबद्धता पनि सो अवसरमा घोषणा गरिएको अध्यक्ष तुलाधरले बताउनुभयो ।
उहाँले बर्दियामा बालविवाहको अवस्था, यसका कारणहरू तथा न्यूनीकरणमा गर्नुपर्ने कार्यहरूका बारेमा बृहत् छलफल गरी यसका लागि बरघरहरुलाई जिम्मेवार बनाउने उध्येश्यका साथ सो कार्यक्रम सम्पन्न भएको बताउनुभयो ।
थारु आयोगका कार्यवाहक अध्यक्ष सुबोधसिंह थारुले बालविवाह न्युनिकरणका लागि आवश्यक योजना, नीति निर्माण र बजेट बिनियोजन गराउन संघीय, प्रदेश र स्थानीय सरकारसँग थारु आयोगले निरन्तर पैरवी गर्ने विश्वास दिलाउनुभयो ।
उहाँले यसका लागि सबैभन्दा उत्तम पात्र बरघरहरुनै रहेको जनाउँदै बरघरहरुको सक्रिय भूमिका भएमा बालविवाहलाई पूर्ण रुपमा रोक्न सकिने बताउनुभयो । लुम्बिनी प्रदेशसभा सदस्य भुवनेश्वर चौधरीले बालविवाह न्युनिकरणका लागि आवश्यक नीति निर्माण र बजेट व्यवस्थापनमा प्रदेश सरकारलाई जिम्मेवार र जबाफदेही बनाउन हरसंभव प्रयास गरिने बताउनुभयो ।
थारु आयोगका सदस्य भोलाराम चौधरीले समग्रमा बालविवाहको अवस्था र बालविवाह न्यूनीकरणमा बरघरहरुको भूमिकाका विषयमा प्रस्तुतीकरण गर्दै सबैको सामूहिक प्रयासबाट यो समस्या समाधान हुने बताउनुभयो ।
कार्यक्रममा प्लान ईन्टरनेशनल नेपालका नीति तथा पैरवी व्यवस्थापक ईरशाद अन्सारीले प्लानले विगतदेखिकै बर्दियामा साझेदार संस्थामार्फत बालविवाह न्यूनीकरणमा सहकार्य गर्दै आएको र आगामी दिनमा पनि सो कार्यका लागि बरघरहरुको भूमिकालाई विशेष बनाउने बताउनुभयो ।
बाँके युनेस्को क्लबका कार्यक्रम संयोजक महेश नेपालीले बर्दिया जिल्लामा बालविवाहको अवस्था, बालविवाहका कारण, जिल्लामा यसको न्यूनीकरणका लागि भए/गरेका प्रयासहरू र बालविवाह न्युनिकरणकालागि बरघरहरुको भूमिकाको विषयमा प्रस्तुतीकरण गर्नु भएको थियो ।
उहाँको प्रस्तुतीकरणमा बर्दिया जिल्लामा बालविवाहको अवस्था पाँच वर्ष अघि ४६५ रहेकोमा र हाल घटेर २१५ मा झरेको जानकारी गराइएको थियो ।
खुला छलफलमा सहभागीहरूले विगतको तुलनामा बालविवाहको दर घटेको र यसमा स्थानीय सरकार, विभिन्न संघ, संस्थाहरू र बरघरहरुको उल्लेखनीय भूमिका रहेको बताएका थिए ।
प्रतिक्रिया राख्नुहोस्