बाँकेमा व्यावसायिक रुपमा स्ट्रबेरी खेती सुरु
बाँके । बाँकेको बैजनाथ गाउँपालिका–१, च्यामा गाउँमा पहिलोपटक व्यावसायिक रूपमा स्ट्रबेरी खेती सुरु गरिएको छ। परम्परागत खेती प्रविधिभन्दा आधुनिक कृषि प्रणाली अपनाउँदै कृषकहरू व्यावसायिक उत्पादनतर्फ आकर्षित भएका छन्। स्थानीय किसान सर्पराज बस्नेतका अनुसार स्ट्रबेरी खेतीले राम्रो आम्दानी दिन थालेको छ।

स्ट्रबेरी खेतीले यहाँका किसानलाई नयाँ सम्भावना प्रदान गरेको छ। परम्परागत धान, गहुँ, मकै खेतीभन्दा छोटो समयमा नै राम्रो आम्दानी हुने देखेर कृषकहरू यसतर्फ आकर्षित भएका छन्। उत्पादन भएको स्ट्रबेरीको बजार व्यवस्थापन सहज रहेको बताउँदै बस्नेतले भने ‘स्ट्रबेरीको माग राम्रो छ, बिक्रीमा कुनै समस्या छैन।’ यहाँ उत्पादन भएको स्ट्रबेरी बाँकेको कोहलपुर, नेपालगञ्ज, सुर्खेत हुँदै काठमाडौँसम्म निर्यात भइरहेको छ।

नेपालमा तीन जातका स्ट्रबेरी बढी उत्पादन दिन सक्ने मानिन्छ, जसमा जापानिज क्यामरोसा, चान्डल, र स्विट चार्ली जात यहाँको हावापानीका लागि उपयुक्त रहेको छ। खासगरी जापानिज क्यामरोसा जात नेपालका तराई क्षेत्रहरूको हावापानी अनुकूल भएको पाइन्छ। स्ट्रबेरी खेतीका लागि असोज महिना उपयुक्त समय मानिन्छ।
यहाँ उत्पादन भएको स्ट्रबेरी प्रति किलो ७०० रुपैयाँको दरमा बिक्री भइरहेको छ। नेपालगन्ज मेडिकल कलेज चिसापानीकी विद्यार्थी सोपना बुर्लाकोटीका अनुसार बाँकेमा उत्पादन हुने स्ट्रबेरी र अर्ग्यानिक भएकाले स्वस्थकर छ।

बाँकेको बैजनाथमा हाल छ कट्ठा क्षेत्रफलमा गरिएको स्ट्रबेरी खेतीबाट किसानले एक सिजनमा ८ लाख रुपैयाँसम्म आम्दानी गर्न सफल भएका छन्। पछिल्लो समय व्यावसायिक कृषकहरूका लागि स्ट्रबेरी खेती आम्दानीको भरपर्दो स्रोत बन्न थालेको छ। स्थानीयस्तरमै यसको राम्रो सम्भावना देखिएपछि अन्य किसानहरू पनि यस तर्फ आकर्षित भइरहेका छन्।
प्रतिक्रिया राख्नुहोस्