धनकुटा बजार नजिकका जङ्गलमा आगलागी, बजार जोखिममा

धनकुटा । धनकुटा नगरपालिका–५ स्थित बडहरे सामुदायिक बन र वडा नं. ८ मा छोटीमा रहको सामुदायिक बनमा भीषण आगलागी भएको छ । 

बिहीबार दिउँसोबाट सुरु भएको आगो अझै नियन्त्रण हुन सकेको छैन। आगो बढ्दै गएकाले आसपास क्षेत्रको बस्ती जोखिममा परेको छ । नेपाल प्रहरी, सशस्त्र प्रहरी र स्थानीयबासीले आगो नियन्त्रणको प्रयास जारी राखेका छन् । तर, आगो नियन्त्रण हुन नसक्दा बस्तीमा जोखिम बढेको हो । 

आगलागी भएको क्षेत्रमा सडक नभएकाले दमकल पुग्न नसक्दा आगो नियन्त्रणमा समस्या भएको धनकुटाका प्रहरी प्रमुख एसपी श्यामसिंह चौधरीले बताउनु भयो । 

दिउँसो जङ्गलको तल्लो भागबाट सुरु भएको आगो अहिले बस्तीतर्फ बढ्दै गएको छ। आगो बढ्दै गएकाले आसपास क्षेत्रको बस्तीमा जोखिम बढेको स्थानीय मोहन राईले बताउनु भयो । ‘निकै ठूलो आगो लागेको छ । 

आगलागीबाट वडा नं. ५ को जलाधार आसपासको क्षेत्र र वडा नं. ७ चुलीबन आसपासको क्षेत्र जोखिममा परेको छ। आगो निभाउन खटिएका राईले प्रहरीसहित हामीले आगो निभाउने प्रयास गरिरहेका बताउनु भयो । अहिले सो क्षेत्रमा वस्तिमा आगो पस्न नदिन धनकुटा नगरपालिकाका दुई वटा दमकल, नेपाल प्रहरी र सशस्त्र प्रहरीको टोली तैनाथ गरिएको एसपी चौधरीले बताउनु भयो । तर, सडक नहुँदा दमकल आगलागी क्षेत्रमा पुग्न सकेको छैन। उहाँले आगो लगाउनको खोजी सुरु गरिएको पनि जानकारी दिनुभयो ।

यस्तै धनकुटाको महालक्ष्मी नगरपालिका वडा नं. २ सालुम्बामा आगलागी हुँदा स्थानीय पञ्च लुम्बाको गोठघर जलेर नष्ट भएको छ। टिनको छानो, बास र काठले बनेको १ तले गोठघर र घरभित्र रहेको सामानहरू जलेर नष्ट भएको प्रहरीले जनाएको छ। आगलागीबाट एक लाख १५ हजार रुपैयाँ बरावरको क्षति भएको एसपी चौधरीले बताउनु भयो ।