उदयपुरमा मोटरसाइकलको ठक्करबाट साइकलयात्रीको मृत्यु
उदयपुर । उदयपुरको मदन भण्डारी लोकमार्ग सडकखण्ड अन्तर्गत कटारी नगरपालिका–४ मुसहरी टोलमा मोटरसाइकलको ठक्करबाट एक जना साइकलयात्रीको मृत्यु भएको छ ।
जिल्ला प्रहरी कार्यालय उदयपुरका सूचना अधिकारी प्रहरी नायब उपरीक्षक केदारमान दोङका अनुसार आज उदयपुरको कटारीबाट सिन्धुलीतर्फ जाँदै गरेको प्रदेश २–०१–००३ प ५४२२ नम्बरको मोटरसाइकलले विपरीत दिशाबाट आउँदै गरेको साइकललाई ठक्कर दिँदा साइकलयात्रीको मृत्यु भएको हो ।
दुर्घटनामा सिन्धुली दुधौली नगरपालिका–५ घारीथुम्सीका ७१ वर्षीय अमरबहादुर सुनुवारको मृत्यु भएको जिल्ला प्रहरी कार्यालय उदयपुरले जनाएको छ ।
मोटरसाइकलको ठक्करबाट गम्भीर घाइते भएका सुनुवारको उद्धार गरेर उपचारका लागि कटारी अस्पतालमा ल्याएको भए पनि उपचारको क्रममा उनको मृत्यु भएको प्रहरीले जनाएको छ ।
उनको शव कटारी अस्पतालमा रहेको र सोही दुर्घटनामा परी घाइते भएका कटारी नगरपालिका–६ गेरुवाका २३ वर्षीय अनन्त मगर र मोटरसाइकलको पछाडि सवार एक जनाको कटारी अस्पतालमा उपचार भइरहेको सूचना अधिकारी दोङले बताउनुभयो ।
प्रतिक्रिया राख्नुहोस्