मातृ शिशु मृत्युदर कम गर्न बाँकेमा पारिवारिक विवरण तयार गर्ने अभियान सुरु

नेपालगन्ज। लुम्बिनी प्रदेश सरकारले मातृ शिशु मृत्युदर कम गर्न बाँकेमा मोबाइलमार्फत पारिवारिक स्वास्थ्य विवरण तयार गर्ने अभियान सुरु गरेको छ । महिला, बालबालिका तथा किशोरीको स्वास्थ्य तथा पोषणमा सुधार ल्याउने उद्देश्यले यो अभियान सुरु गरिएको हो । यसअघि लुम्बिनी प्रदेशका पाल्पा र अर्घाखाँचीमा यो अभियान सुरु भइसकेको छ । 

आजदेखि बाँकेमा सुरु भएको अभियानको लुम्बिनी प्रदेशका स्वास्थ्य मन्त्री खेम बहादुर सारुले शुभारम्भ गर्नुभयो । सम्बद्ध सरोकारवालालाई नेपालगन्जमा बोलाएर सुरु गरिएको अभियानमा मन्त्री सारुले जटिल अवस्था र दुई वर्ष मुनिका बालबालिकाहरूको समयमै पहिचान गरी स्वास्थ्य तथा पोषण अवस्थामा सुधार ल्याउन यो अभियानले महत्त्वपूर्ण सहयोग पुर्‍याउने विश्वास गर्नुभयो ।

उहाँले शारीरिक, मानसिक र भावनात्मक स्वास्थ्य सुधारका लागि प्रदेश स्वास्थ्य मन्त्रालयले प्राथमिकता दिएर काम गर्दै आएको बताउनुभयो । लुम्बिनी प्रदेशका बाँके, पाल्पा र अर्घाखाँचीमा मातृ तथा बाल मृत्युदर अत्यन्तै कमजोर भएकाले परिवार स्वास्थ्य विवरण तयार गर्न यो अभियान सुरु गरिएको पनि उहाँले बताउनुभयो । बाँके मुस्लिम समुदाय बाहुल्य रहेको जिल्ला भएकाले मन्त्रालयका कार्यक्रमले त्यसलाई पनि ध्यान दिएको बताउनुभयो । उहाँले स्वास्थ्य सेवा सुधारका लागि स्थानीय सरकारसंगको समन्वय र सहकार्यमा जोड दिनुभयो । 

प्रदेशसभा सदस्य दुर्गा चौधरीले सबैको समन्वय र सहकार्यबाट मातृ र शिशु मृत्युदर घटाउन सकिने बताउनुभयो । यस्तै प्रदेशसभा सदस्य सन्जु कुमारी थारुले लुम्बिनी प्रदेशमा बढ्दो मातृ र शिशु मृत्युदर घटाउन संसदमा बहसको विषय बनाइएको बताउनुभयो । उहाँले स्वास्थ्य क्षेत्रको सुधारमा स्वयंसेविकाहरूको महत्त्वपूर्ण भूमिका हुने भएकाले उनीहरुलाई प्रदेश सरकारले प्रोत्साहित गर्नुपर्ने बताउनुभयो । उहाँले मन्त्रालयलाई बजेटको व्यवस्थापनका लागि आफूहरूले पहल गर्ने पनि बताउनुभयो । अर्का प्रदेशसभा सदस्य अम्बिका काफ्लेले मातृ तथा नवजात शिशु सुरक्षाका लागि यो अभियान उपयोगी हुने बताउनुभयो । उहाँले स्तरीय स्वास्थ्य सेवा प्रवाहका लागि मन्त्रालयले गरेका कार्यक्रमहरू प्रभावकारी बन्दै गएको आफूले पाएको धारणा राख्नुभयो । यस्तै उहाँले किशोरीहरूमा लगाइने पाठेघरको मुखको क्यान्सर विरुद्धको खोप (एचपीभी) को पहुँच नपुगेको भन्दै मन्त्रीको ध्यानाकर्षण गराउनुभयो  । बाँकेका विकट नरैनापुर र जानकी गाउँपालिकाका किशोरीहरू एचपीभी खोपको पहुँच बाहिर रहेकाले उनीहरुलाई पहुँचमा ल्याउन आग्रह गर्नुभयो । 

लुम्बिनी प्रदेशका स्वास्थ्य सचिव दुर्गा श्रेष्ठले बाँके जिल्लामा मातृ मृत्युदर र बाल मृत्युदर घटाउन यो अभियानले सघाउ पुर्‍याउने दाबी गर्नुभयो । उहाँले गर्भवती महिलाले नियमित चेकजाँच नगर्ने र स्वास्थ्य संस्थामा सुत्केरी हुन नआउने गरेकाले पनि मातृ मृत्युदर र बाल मृत्युदर न्यूनीकरण चुनौतीपूर्ण बनेको बताउनुभयो । आफू १० वर्ष भेरी अस्पतालमा सेवा गरेको स्मरण गर्दै उहाँले यहाँको स्वास्थ्य सचेतताको पाटोलाई प्रभावकारी ढङ्गबाट अगाडि बढाउनुपर्ने आवश्यकता रहेको औँल्याउनुभयो । यस्तै लुम्बिनी प्रदेशका स्वास्थ्य निर्देशनालयका निमित्त निर्देशक रोशनलाल चौधरीले महिला, बालबालिका तथा किशोरीको स्वास्थ्य तथा पोषण सुधार विशेष अनुदान कार्यक्रम सञ्चालन मार्ग निर्देशन अनुसार महिला, बालबालिका, किशोर किशोरीको स्वास्थ्य सुधार्ने अभियान अन्तर्गत अभियान सुरु गरिएको बताउनुभयो ।