नवलपरासी काङ्ग्रेसले पार्टी र नेताका विरुद्धमा बोल्नेलाई कारबाही गर्ने

नवलपरासी । नेपाली कांग्रेस पश्चिम नवलपरासीले पार्टी नेतृत्व र पार्टीविरुद्ध बोल्नेलाई कारबाही गर्ने चेतावनी दिएको छ। केन्द्रिय सदस्य देवेन्द्र राज कँडेल र प्रदेश महामन्त्री बिक्रम खनाल लगायतको उपस्थितिमा बसेको जिल्ला कार्यसमितिको बैठकले यस्तो निर्णय गरेको हो।

बैठकले पार्टी र नेताविरुद्ध सार्वजनिक कार्यक्रममा बोल्न, आरोप प्रत्यारोप गरी सामाजिक सञ्जालमा लेख्न र नकारात्मक टिप्पणी गर्न निषेध गरेको छ। जिल्ला सभापति अर्जुन कुमार पोखरेलले पार्टीलाई एकताबद्ध बनाउन यस्तो निर्णय गरिएको बताए। निर्णय उल्लंघन गर्नेलाई पार्टी विधान अनुसार कारबाही हुने उनले बताए।

जिल्लामा शेखर कोइराला र शेरबहादुर देउवा पक्षबीचको विवादले पार्टी कमजोर बनेको विश्लेषण गरिएको छ। यस निर्णयमा केही नेताले सहमति जनाएका छन् भने केहीले पार्टीभित्रको गलत कदमविरुद्ध बोल्न नदिनु गलत भएको टिप्पणी गरेका छन्।