धनकुटामा रेडियो नेपालको ७५औँ वार्षिकोत्सव तथा हीरक महोत्सव मनाइयो
धनकुटा । धनकुटामा सार्वजनिक सेवा प्रसारण नेपाल, रेडियो नेपालको ७५औँ वार्षिकोत्सव तथा हीरक महोत्सव मनाइएको छ ।
सार्वजनिक सेवा प्रसारण रेडियो नेपाल प्रादेशिक प्रसारण केन्द्र धनकुटाको आयोजनामा शुभकामना आदानप्रदान कार्यक्रमको आयोजना गरेर ७५औँ वार्षिकोत्सव तथा हीरक महोत्सव मनाइएको हो ।
रेडियो नेपालको ७५औँ वार्षिकोत्सवसँगै प्रादेशिक प्रसारण केन्द्र धनकुटा ३२औँ वर्षमा प्रवेश गरेको अवसरमा शुभकामना आदान–प्रदान कार्यक्रम गरिएको हो ।
कार्यक्रममा हीरक महोत्सवको अवसरमा आयोजित कर्मचारीहरुबीच भएको विभिन्न खेलकुद प्रतियोगिताका विजेतालाई पुरस्कार वितरण गरिएको छ ।
रक महोत्सवको अवसरमा कर्मचारीहरुबीच व्याडमिन्टन सिङ्गल ‘बी’, व्याडमिन्टन सिङ्गल ‘ए’, व्याडमिन्टन डबल, तातो आलु प्रतियोगिता हाँडिफोर प्रतियोगिता, बेलुन फुटाउने प्रतियोगिता, हाजिरी जवाफ प्रतियोगिता गरिएको थियो ।
प्रादेशिक प्रसारण केन्द्र प्रमुख तिलबिक्रम चेम्जोङको अध्यक्षतामा भएको कार्यक्रममा धनकुटा नगरपालिकाका प्रमुख चिन्तन तामाङ, उपप्रमुख भीमादेवी खनाल, धनकुटा नगरपालिकाका प्रमुख प्रशासकीय अधिकृत दशरथ राई, नेपाल टेलिकम धनकुटाका लेखा अधिकृत अनुजबहादुर श्रेष्ठ, नेपाल पत्रकार महासङ्घ धनकुटाका अध्यक्ष विदुर खवास, सामुदायिक रेडियो प्रसारक संघका केन्द्रीय उपाध्यक्ष गोपाल बराइली लगायतले शुभकामना व्यक्त गर्नुभएको थियो ।
उहाँहरूले रेडियो नेपाल नेपालको अग्रणी सञ्चारमाध्यम भएकोले रेडियो नेपालले जनताको मनमा बस्न सक्ने कार्यक्रम उत्पादन गर्नुपर्नेमा जोड दिनुभयो ।
त्यस्तै उहाँहरूले रेडियो नेपालको महिमा नघटेको बताउँदै समावेशी प्रसारणमा गएपछि झन लोकप्रियता बढेको बताउनुभयो । प्रविधिको विकाससँगै रेडियो नेपालले पनि आफूलाई परिमार्जन गर्नुपर्नेमा उहाँहरूको भनाइ छ ।
रेडियो नेपाल प्रादेशिक प्रसारण केन्द्र धनकुटाबाट प्रसारण हुने कार्यक्रम इलामको आइतबारे, सोलुखुम्बुको पत्ताले, पाँचथरको सिलौटी तथा धनकुटाको भेडेटारमा रहेको एफएम रिले स्टेसन र विभिन्न डिजिटल प्लेटफर्मबाट प्रसारण हुने प्रादेशिक प्रसारण केन्द्र धनकुटाका प्रमुख चेम्जोङले बताउनुभयो ।
प्रतिक्रिया राख्नुहोस्