रेडियो नेपालकाे ७५औँ वार्षिकोत्सव(हीरक महोत्सव)का अवसरमा विशेष समारोहको आयोजना
काठमाडौँ । सार्वजनिक सेवा प्रसारण नेपाल रेडियो नेपालले आफ्नो ७५ औँ स्थापना दिवस एवं हीरक महोत्सव आज विशेष समारोहको आयोजना गरी मनाएको छ ।
विशेष समारोहको उद्घाटन गर्नुहुँदै राष्ट्रपति रामचन्द्र पौडेलले सार्वजनिक सेवा प्रसारण संस्थामा रूपान्तरण भएको रेडियो नेपाललाई नागरिक केन्द्रित बनाउँदै आवाज विहीनहरूको आवाज बन्न र मुलुकले अङ्गीकार गरेको संघीय लोकतान्त्रिक गणतन्त्रलाई संस्थागत गर्ने दिशामा सक्रिय रहन आह्वान गर्नुभयो ।
राष्ट्रपति पौडेलले सार्वजनिक सेवा प्रसारणको मर्म, भावना र उद्देश्यअनुसार यसले आगामी दिनमा प्रभावकारी तवरले काम गर्नुपर्ने चुनौती रहेको पनि बताउनुभयो ।
उहाँले रेडियो नेपालले लोकतान्त्रिक मूल्य मान्यता, स्वतन्त्र व्यावसायिक पत्रकारिताको धर्म अनुरुप स्वच्छ, निष्पक्ष र जनताप्रति उत्तरदायी भएर नागरिकलाई सुसूचित गर्न सार्वजनिक सेवा प्रसारणका सम्बन्धमा विश्वले स्वीकारेका आधारभूत मान्यतालाई आत्मसात गर्ने विश्वास लिएको बताउनुभयो ।
उहाँले रेडियो नेपाललाई नेपालको संविधानले व्यवस्था गरेको नागरिकको सूचनाको हक प्रत्याभूत गर्न तथा सार्वजनिक सेवा प्रसारणको मर्म, भावना र उद्देश्यअनुसार प्रभावकारी ढङ्गले काम गर्न सुझाव दिनुभयो ।
राष्ट्रपति रामचन्द्र पौडेलले दक्ष जनशक्ति र आधुनिक प्रविधिको अधिकतम उपयोग गरी रेडियो नेपाललगायत आमसञ्चार माध्यमले आफ्नो सेवा, गुणस्तर र समाचार प्रस्तुतिमा समयानुकूल परिमार्जन गरी अझै जिम्मेवार, विश्वसनीय र जबाफदेही भएर काम गर्ने विश्वास लिएको बताउनुभयो ।
राष्ट्रपति रामचन्द्र पौडेलले सबै जातजाति, भाषाभाषीको अधिकार संरक्षण गर्ने बहुलवादमा आधारित लोकतन्त्रको सुदृढीकरणलाई आफ्नो धर्म मानेर काम गर्न अनुरोध गर्दै इन्टरनेट र सूचना प्रविधिको विकासले समाचारको विषयवस्तु, सञ्चारमाध्यम र सूचना सम्प्रेषणमा आएको परिवर्तन उल्लेखनीय रहेको बताउनुभयो ।
सञ्चार तथा सूचना प्रविधिमन्त्री पृथ्वी सुब्बा गुरुङले विविधताभित्र एकता र समानता खोज्दै आफ्ना कार्यक्रमहरूलाई त्यसैतर्फ केन्द्रित गरेर अगाडी बढ्ने छ भन्नेमा विश्वास लिएको बताउनुभयो ।
उहाँले बदलिँदो परिस्थिति अनुसार आफ्नो दायित्व पुरा गर्न रेडियो नेपालले आफ्नो प्रसारण कार्यक्षेत्र सर्वव्यापी बनाउदै देश र जनताप्रति उत्तरदायी भएर भएर अगाडी बढ्ने बताउनुभयो ।
सार्वजनिक सेवा प्रसारण नेपालका कार्यकारी अध्यक्ष डा.महेन्द्र विष्टले सार्वजनिक सेवा प्रसारणको अन्तर्राष्ट्रिय मान्यता र राष्ट्रिय अभ्यासका आधारमा प्राथमिकताहरू निर्धारण गरेर अगाडी बढेको बताउनुभयो ।
कार्यकारी अध्यक्ष विष्टले रेडियो नेपालले निर्माण गरेको विरासतलाई अझ उचाइमा लैजानका लागि दृढताका साथ लाग्ने प्रतिबद्धता व्यक्त गर्दै बदलिँदो परिस्थिति अनुसार नागरिकलाई पहिलो प्राथमिकतामा राखेर अगाडी बढ्न सधैँ लागिरहने बताउनुभयो ।
पिएसवी नेपाल रेडियो नेपालका नायब कार्यकारी निर्देशक खगेन्द्र खत्रीले रेडियो नेपालले ७५ औँ वर्ष पुरा गर्दा सामाजिक, शैक्षिक, सांस्कृतिक साहित्यिक र साङ्गीतिक सबै क्षेत्रको विकासमा महत्वपूर्ण भूमिका निर्वाह गरेको र आगामी दिनमा नागरिक प्रतिको दायित्व पुरा गर्न सार्वजनिक सेवा प्रसारण नेपाल रेडियो नेपाल निरन्तर अगाडी बढ्ने बताउनुभयो ।
समारोहमा राष्ट्रपति रामचन्द्र पौडेलले सार्वजनिक सेवा प्रसारण नेपाल रेडियो नेपालको हीरक महोत्सवका अवसरमा स्थापना गरिएको हीरक स्तम्भको अनावरण गर्नुभएको थियो ।
समारोहमा राष्ट्रिय स्रष्टा सम्मानबाट रामकृष्ण दुवाल र नन्दकृष्ण जोशीलाई ताम्रपत्र र ५१ हजार रुपैयाँ नगदसहित सम्मान गरिएको छ ।
यसैगरी वरिष्ठ सङ्गीतकारहरू रत्न बेहोसी, मोहनप्रसाद जोशी र रत्ना कुमारी गुरुङलाई स्रष्टा सम्मानबाट सम्मानित गरिएको छ ।
यस्तै उत्कृष्ट कर्मचारीहरू दानसिंह ऐर, निलकण्ठ आचार्य, अर्जुन यादव, टङ्कनाथ खनाल र बालिका मादेनलाई पुरस्कृत गरिएको छ भने उत्कृष्ट स्थानीय संवाददातामा कैलालीका ईश्वर साउदलाई पुरस्कृत गरिएको छ ।
रेडियो नेपालमा २५ वर्ष सेवा अवधि पुरा गरेका २२ जना कर्मचारीहरूलाई दीर्घ सेवा पदकबाट सम्मान गरिएको छ ।
रेडियो नेपालले हीरक महोत्सवका अवसरमा आयोजना गरेको राष्ट्रव्यापी आधुनिक गीतसङ्गीत प्रतियोगिता २०८१ मा प्रथम हुनुभएका परेश राई, द्वितीय हुनुभएका दीपिका श्रेष्ठ र तृतीय हुनुभएका पूर्ण बहादुर बि.क लाई क्रमशः ४० हजार, ३० हजार र २० हजार नगदसहित प्रमाण–पत्र प्रदान गरियो ।
यसैगरी, प्रतियोगितामा उत्कृष्ट सङ्गीतकार चण्डीप्रसाद काफ्ले र उत्कृष्ट रचनाकार र होम न्यौपानेलाई २५/२५ हजार नगदसहित प्रमाण–पत्र प्रदान गरिएको छ ।
सार्वजनिक सेवा प्रसारण नेपाल रेडियो नेपालको ७५ औँ स्थापना दिवसका अवसरमा रेडियो नेपालको मुखपत्र झङ्कार र रेडियो नेपालको ७५ वर्ष एक सय एक स्रष्टा नामक पुस्तक सार्वजनिक गरिएको छ ।
प्रतिक्रिया राख्नुहोस्