लक्षिमा-शेर बहादुर रानाभाट स्मृति पुरस्कार साहित्यकार डा. तिमिल्सिनालाई

नेपालगञ्ज । यस वर्षको लक्षिमा-शेर बहादुर रानाभाट स्मृति पुरस्कार साहित्यकार डा. हरि प्रसाद तिमिल्सिनालाई प्रदान गरिएको छ । नेपालगन्जमा आज आयोजित एक कार्यक्रमका बीच प्राज्ञ सनत रेग्मीले उपप्राध्यापक समेत रहनुभएका डा. तिमिल्सिनालाई १५ हजार १ सय १ रुपैयाँ राशिको लक्षिमा-शेर बहादुर रानाभाट स्मृति पुरस्कार प्रदान गर्नुभएको हो । 

साहित्य क्षेत्रमा पुर्याएको योगदानको उच्च कदर गर्दै भेरी साहित्य समाज केन्द्रीय समिति बाँकेले डा. तिमिल्सिनालाई पुरस्कृत गरेको हो । साहित्यकार भरत बहादुर रानाभाट र उहाँका भाई भिम बहादुर रानाभाटले आफ्ना स्वर्गीय आमा लक्षिमा रानाभाट र बुवा स्वर्गीय शेर बहादुर रानाभाटको स्मृतिमा २०७२ सालमा भेरी साहित्य समाजमा रु। १ लाख ११ हजार १ सय ११ रुपैयाँको अक्षयकोष स्थापना गर्नुभएको थियो । उहाँहरूको बुवाको निधन भएको दिन चैत १८ गते उक्त पुरस्कार दिँदै आइएको छ । भेरी साहित्य समाजका अध्यक्ष इन्द्र बहादुर बस्नेतको अध्यक्षतामा पुरस्कार वितरण समारोह सम्पन्न भएको थियो । 

कार्यक्रममा पुरस्कारका बारेमा भरत बहादुर रानाभाट र पुरस्कृत व्यक्तित्वका बारेमा लेक प्रसाद प्याकुरेलले जानकारी गराउनुभएको थियो । कार्यक्रमको सञ्चालन भेरी साहित्य समाजकी महासचिव गीता अर्यालले गर्नुभएको थियो भने स्वागत मन्तव्य सचिव प्रभात सुवेदीले गर्नुभएको थियो ।