बिहे भोज गएका दुई समूह बीच झडप : घाइते एक जनाको उपचारको क्रममा मृत्यु

बाजुरा ।  बाजुराको बुढीगंगा नगरपालिका–८ मोटाबाडामा बिहेको निम्तोमा गएका दुई समूह बीच झडप हुँदा घाइते एक जनाको उपचारको क्रममा मृत्यु भएको छ ।

मृत्यु हुनेमा बुढीगंगा नगरपालिका–८ डुग्रीतोलाका २९ बर्षिया रणबहादुर थापा रहेका छन् । 

बिहीबार राति बिहेको निम्तो मान्न गएका दुई समुहबीच दोहोरो झडप भएको थियो । झडपमा गम्भीर घाइते भएका थापाको उपचारका क्रममा अछामको बयालपाटा अस्पतालमा मृत्यु भएको जिल्ला प्रहरी कार्यालय बाजुराका सूचना अधिकारी जनक बोहोराले जानकारी दिनुभयो ।  

उहाँका अनुसार घटनामा संलग्न रहेको आरोपमा तीन जनालाई पक्राउ गरी जिल्ला प्रहरी कार्यालयमा ल्याइएको र घटनाबारे थप अनुसन्धान भइरहेको छ ।

पक्राउ परेका बुढीगंगा नगरपालिका–७ बाईलका दीर्घ विष्ट, खेम विष्ट र लोकेन्द्र खड्कामाथि अनुसन्धान थालिएको र मृतक थापालाई बयालपाटा अस्पतालबाट पोष्टमाटमको लागि जिल्ला अस्पताल ल्याउने तयारी भइरहेको जिल्ला प्रहरी कार्यालय बाजुराले जनाएको छ ।