वीरगंज भन्सारबाट ७ महिनामा ४० अर्ब ३४ करोड बढीको नेपाली उत्पादन निर्यात

बीरगंज । बीरगंज स्थित एकिकृत तथा आईसिपी भन्सार नाका हुँदै आर्थिक बर्ष २०८१/०८२ को   साउन देखि माघ मसान्तसम्मको ७ महिनाको अवधिमा भारत तथा तेस्रो मुलुक तर्फ ४० अर्ब ३४ करोड ५४ लाख मूल्य बराबरको नेपाली उत्पादन निर्यात भएको छ । 

गत वर्षका तुलनामा यस आर्थिक वर्षको ७ महिनामा १४० प्रतिशतले निर्यात वृद्धि  भएको वीरगंज स्थित आईसिपी भन्सार कार्यालयका प्रमुख भन्सार प्रशासक दिपक लामिछानेले जानकारी दिनुभयो । आर्थिक बर्ष २०८०/०८१ को   साउन देखि माघ मसान्तसम्मको ७ महिनाको अवधिमा भारत तथा तेस्रो मुलुक तर्फ १६ अर्ब ७६ करोड ३५ लाख मूल्य बराबरको नेपाली उत्पादन निर्यात भएको थियो ।

वीरगंज नाका हुँदै भारत, डेनमार्क, अस्ट्रेलिया, अमेरिका, चीन, रुस, फिलिपिन्स, थाइल्यान्ड लगायतका मुलुकहरूमा तेल, जुस, कपडा जुत्ता, फलामे पाता लगायतका नेपाली उत्पादन तथा जडीबुटी निर्यात भएको वीरगंज स्थित आईसिपी भन्सार कार्यालयका प्रमुख भन्सार प्रशासक दिपक लामिछानेले जानकारी दिनुभयो । 

आईसिपी भन्सार नाका हुँदै आर्थिक बर्ष २०८१/०८२ को ७ महिनामा सबैभन्दा धेरै भटमासको प्रशोधित तेल भारत निर्यात भएको छ । ७ महिनामा  वीरगंज नाकाबाट मात्रै १९ अर्ब ३६ करोड ६५ लाख ७७ हजार मूल्य बराबरको भटमासको प्रशोधित तेल निर्यात भएको छ । त्यसैगरी वीरगंज नाकाबाट सो अवधिमा  ३ अर्ब ९६ करोड ५३ लाख ७२ हजार मूल्य बराबरको फलफूलको जुस तथा जाम भारत निर्यात भएको छ ।

सो अवधिमा ४ अर्ब ६३ करोड २१ लाख ५५ हजार मूल्य बराबरको सूर्यमुखी प्रशोधित तेल निर्यात भएको छ भने ३ अर्ब १२ करोड ६३ लाख २१ हजार मूल्य बराबरको फलाम तथा फलामका सामाग्रीहरू निर्यात भएको वीरगंज भन्सार कार्यालयबाट उपलब्ध तथ्याङ्कमा उल्लेख छ । 

वीरगंज नाकाबाट ७ महिनाको अवधिमा १ अर्ब   ६० करोड ५४ लाख १५ हजार मूल्य बराबरको सेन्थेटिक यार्न निर्यात भएको छ । त्यसैगरी सो अवधिमा १ अर्ब ४७ करोड ४३ लाख ५७ हजार मूल्य बराबरको विभिन्न कपडाहरू भरत तथा तेस्रो मुलुक निर्यात भएको छ । सो अवधिमा १ अर्ब २२ करोड ५९ लाख ३६ हजार मूल्य बराबरको पशु आहारको कच्चा पदार्थ, ७५ करोड ४६ लाख ८३ हजार मूल्य बराबरको सवारी साधन,मेसिनरी तथा पाटपुर्जा,६५ करोड ३४ लाख १२ हजार मूल्य बराबरको आयुर्वेदिक औषधि, र ५५ करोड ३८ लाख ३३ हजार मूल्य बराबरको कुकुर तथा बिरालाको खाना तेस्रो मुलुक निर्यात भएको बीरगंज भन्सार कार्यालयका प्रमुख भन्सार प्रशासक लामिछानेले बताउनुभयो । 

सो अवधिमा बीरगंजको आईसिपी भन्सार नाकाबाट मनोरञ्जनका सामान, स्पोर्ट सुज, दन्त मन्जन,  रेसाको कपडा,स्टिलका भाडाकुडा र सि.आर.सीट, जीआई.पाइप लगायतका सामानहरू भारत तथा तेस्रो मुलुक निर्यात भएको वीरगंज भन्सार कार्यालयका प्रमुख भन्सार प्रशासक दिपक लामिछानेले जानकारी दिनुभयो ।