हत्याको आरोपमा २ जना पक्राउ

दाङ । गोली हानेर साथीको हत्या गरेको अभियोगमा दुई जना पक्राउ परेका छन् ।

जिल्ला प्रहरी कार्यालय दाङका अनुसार दंगीशरण-२ कौवाघारीमा प्रेम कुसारीको गोली हानी हत्या गरेको अभियोगमा दंगीशरण-२ कै छविलाल डाँगी र पुष्प बस्नेत पक्राउ परेका हुन्

छविलाललाई बाँकेको कोहलपुर र पुष्पलाई तुलसीपुर बजारबाट पक्राउ गरिएको हो । माघ ३ गते छविलाल र पुष्पले प्रेमलाई गोली हानेर हत्या गरेका थिए । उनीहरूले गोली हाने पनि जिंगटको रूखबाट खसेर घाइते भएको बताएका थिए ।

प्रेमको नेपालगञ्जमा उपचारका क्रममा मृत्यु भएको थियो । खुट्टाको घुँडा र साँप्रोमा गम्भीर चोट लागेका उनलाई थप उपचारका लागि नेपालगन्ज लगिएको थियो । त्यहाँ चिकित्सकले कुसारीलाई मृत घोषणा गरेका थिए । गएराति शव घर ल्याएर राति नै उनको दाहसंस्कार गर्ने तयारी थियो ।

तर, छिमेकीले कुसारीलाई गोली हानिएको सूचना लिक गरेपछि दाहसंस्कार रोकिएको थियो । प्रहरीले गएराति नै मृतकको घरमा पुगेर अनुसन्धान थालेको छ । प्रहरी स्रोतका अनुसार केहि स्थानीय व्यक्तिहरुलाई नियण्त्रणमा लिई सोधपुछ गर्दा शिकार खेल्न गएका बेला बन्दुक आफैँ पड्केर कुसारीको ज्यान गएको बयान दिएका ।

उनीसँग सँगै जङ्गल गएका छविलाल डाँगी र पुष्प बस्नेत भने घटना लगतै फरार रहेका थिए। छिमेकीका अनुसार तीनै जनाले सँगै मदिरा सेवन गरेका र पुष्प र छविलालले कुसारीलाई घट्टेखोला जङ्गलमा लगेका थिए । जिप्रका दाङ,इप्रका तुलसीपुर र इप्रका खिलतपुरको संयुक्त टोली घटनास्थल पुगेर हतियारको खोजतलास गरिरहेको छ ।

घटनाको गम्भीर अनुसन्धान भइरहेको एसपी तिमिल्सिनाले बताउनु भयो ।