एनपिएल विजेता जनकपुर बोल्ट्सलाई प्रधानमन्त्रीको बधाई

काठमाडौँ । प्रधानमन्त्री केपी शर्मा ओलीले पहिलो संस्करणको नेपाल प्रिमियर लिग (एनपिएल)को उपाधि जित्न सफल जनकपुर बोल्ट्सलाई बधाई दिनुभएको छ । 

प्रधानमन्त्री ओलीले सामाजिक सञ्जाल फेसबुकमार्फत एनपिएलको उपाधि जित्न सफल जनकपुर बोल्ट्सलाई बधाई दिनुभएको हो । 

उहाँले आजको खेलमा सुदूरपश्चिम रोयल्सको पनि राम्रो प्रदर्शन रहेको सामाजिक सञ्जालमा उल्लेख गर्नुभएको छ ।

एनपिएलको पहिलो संस्करणको सम्पन्न भएसँगै नेपाली क्रिकेटको महापर्व आज सम्पन्न भएको बताउनुहुँदै प्रधानमन्त्री ओलीले एनपीएलमा सहभागी सबै टिम र आयोजक तथा व्यवस्थापक सबैलाई धन्यवाद दिनुभयो । 

उहाँले सामाजिक सञ्जालमा लेख्नुभएको छ, “बधाई जनकपुर बोल्ट्स्, एनपीएल उपाधि हात पारेकोमा । आजको खेलमा सुदूरपश्चिम रोयल्सको पनि राम्रो प्रदर्शन थियो । यससँगै नेपाली क्रिकेटको महापर्व आज सम्पन्न भएको छ । एनपीएलमा सहभागी सबै टिम र आयोजक तथा व्यवस्थापक सबैलाई धन्यवाद!! फेरि पनि बधाई जनकपुर बोल्ट्स् !”