धेरै सहज र कम खर्चिलो भएपछि थ्रेसर मेसिनको प्रयोगमा वृद्धि

बाँके ।बाँकेका कृषकहरूमा अहिले थ्रेसर मेसिनको प्रयोग बढेको छ, जसले गर्दा धान दाउने काम अझ सहज र छिटो भएको छ। पायो जनशक्तिको अभाव र खर्च बढी हुने समस्याबाट मुक्त हुँदै किसान अब आधुनिक थ्रेसर मेसिनतर्फ आकर्षित भएका छन् ।

कृषकहरूले अहिले धान काट्नको साथसाथै थ्रेसर मेसिनको प्रयोग गरेर धान दाइँ गर्न थालेका छन्। यससँगै खेतमा काम गर्ने मजदुरको अभाव पनि कम भएको छ। बाँके जिल्लामा प्रायः सबै स्थानमा अहिले धान पाकिसकेको र थ्रेसर मेसिनको प्रयोग गरेर किसानले धानको दाइँ गर्न थालेका छन्।

कोहलपुर ७ रजगढवाका  कृषक रामचरण थारुले भन्नुभयो “गाउँमा काम गर्ने मान्छे पाउन मुस्किल छ। र, पाइएका खेतालाको खर्च पनि महँगो छ। थ्रेसर मेसिनको प्रयोग गर्दा समय र पैसा दुवै बचत हुन्छ, त्यसैले अब हामी थ्रेसर मेसिनमै निर्भर भएका छौँ।”

त्यस्तै, कोहलपुर १३ भरैयाका  कृषक जयलाल घर्यिले पनि थ्रेसर मेसिनको उपयोगलाई निकै सहज र प्रभावकारी मान्दै भन्नुभयो “पछिल्लो समय हलगोरु र कामदारको अभाव छ, तर थ्रेसर मेसिनले यो समस्या समाधान गरेको छ। यो सानो र चलाउन सजिलो छ, जसले गर्दा जुनसुकै स्थानमा लगेर काम गर्न सकिन्छ।”

थ्रेसर मेसिनका सञ्चालक  रामेश्वर कार्कीले पनि यस मेसिनको फाइदा बारे जानकारी दिँदै भन्नुभयो, “थ्रेसर मेसिनले समय र पैसाको बचत गर्ने काम गर्छ। अब हामी १ क्विन्टल धानको दाइँ गर्दा १० किलो धानको अतिरिक्त हिस्सा लिन्छौँ। यसले किसानलाई ठूलो फाइदा पुर्याएको छ।”

थ्रेसर मेसिनको प्रयोगले जहाँ एकतर्फ किसानको मेहनत कम गरेको छ भने, अर्कोतर्फ यसले दाइँ संस्कृतिको परम्परा जोगाउनका लागि अझै चुनौती पनि प्रस्तुत गरेको छ। कृषक  तुलबिर खत्रीले भन्नुभयो, “आधुनिक प्रविधिले कामलाई सजिलो बनाएको छ, तर हामीले मौलिक दाइँ संस्कृतिलाई पनि जोगाउनुपर्छ।”

बाँकेका कृषकले थ्रेसर मेसिनको प्रयोगबाट न केवल कामको द्रुतता र कम खर्चको अनुभव गर्दैछन्, यसले स्थानीय अर्थतन्त्रमा पनि सकारात्मक प्रभाव पार्ने आशा गरिएको छ।