ठुला दलमा विश्वासको वातावरण तयार हुन सकेन:   महासचिव पोखरेल 

दाङ । नेकपा एमालेका महासचिव शङ्कर पोखरेलले ठुला दलका बिचमा विश्वासको वातावरण तयार हुन नसकेको बताउनुभएको छ । हसनापुर-बेल टाकुरा खानेपानी तथा सरसफाई समितिका परिकल्पनाकार दँगाली कम्युनिस्ट आन्दोलनका नेता श्रीमणि आचार्यको शालिक अनावरण कार्यक्रममा बोल्नुहुँदै महासचिव पोखरेलले बताउनुभएको हो । 

पञ्चायत र निरङ्कुश राजतन्त्रका विरुद्ध दलहरू मिलेर आन्दोलन सफल पारेको बताउनुहुँदै महासचिव पोखरेलले अब पनि देशका ठुला दलका नेताहरू मिल्नुको विकल्प नरहेको बताउनुभयो । सबै राजनीतिक दलका बिचमा विश्वासको वातावरण तयार गर्नुपर्ने उहाँले बताउनुभयो । 

राजनीतिलाई खराब तत्वले बिगारेको भन्दै वर्तमान सत्ता गठबन्धन आगामी निर्वाचनसम्म पुग्ने बताउनुभयो । वर्तमान सत्ता गठबन्धनलाई आगामी निर्वाचनमा  बहुमत मार्फत देशमा समृद्धिको आधार तयार गर्ने बताउनुभयो । 

दाङको मेरुदण्डका रुपमा रहेको टरिगाऊ विमानस्थल निर्माण हुने बताउनुभयो । तुलसीपुर उपमहानगरपालिकाले तयार गरेको डिपिआर अनुसार १ हजार ५ सय रन-वे निर्माण हुने भएको भन्दै वर्तमान सरकारले त्यसको पहल गर्ने बताउनुभयो । 

यस्तै कार्यक्रममा नेपाली काङ्ग्रेसका केन्द्रीय सदस्य तथा प्रतिनिधिसभा सदस्य दिपक गिरिले राजनीतिक स्थायित्वका लागि वर्तमान संविधानलाई हेरफेर गर्न आवश्यक रहेको बताउनुभयो । छोटो समयमा सत्ता परिवर्तन हुने समस्याले राजनीतिलाई हेर्ने दृष्टिकोण गलत हुन थालेको बताउनुभयो ।  यसका लागि राजनीतिक स्थायित्व गर्न ठूलो दलहरू मिल्नुपर्ने बताउनुभयो ।