चितुवाको आक्रमणबाट पर्सामा एक प्रहरीसहित तीन जना घाइते

वीरगञ्ज । पर्साको पोखरियामा चितुवाको आक्रमणबाट एक प्रहरीसहित तीन जना घाइते भएका छन् । घाइते मध्ये एक जनाको अवस्था गम्भीर रहेको छ । 

मङ्गलवार मध्यराति जङ्गलबाट गाँउमा प्रवेश गरेको चितुवाको आक्रमणबाट पोखरिया नगरपालिका वडा नम्बर ५ सतवरियाका जोगिन्द्र साह तेली, वडा नम्बर ४ का दिल महम्मद मियाँ र ईलाका प्रहरी कार्यालय पोखरियामा कार्यरत प्रहरी जवान सुचिन्द्र प्रसाद यादव घाइते हुनुभएको  स्थानिय शैलेश गुप्ताले जानकारी दिनुभयो ।

सतवरियास्थित गहुँ  खेत हुँदै गाउँमा प्रवेश गरेको चितुवाले केही स्थानीयलाई आक्रमण गरेको खबर पाउनसाथ प्रहरी उक्त स्थानमा पुगेको थियो । चितुवालाई नियन्त्रणमा लिन जाँदा प्रहरी जवान सुचिन्द्र यादव पनि घाइते हुनुभएको हो । 

चितुवाको आक्रमणबाट गम्भीर घाइते महम्मद मियाँको पोखरिया अस्पतालमा प्राथमिक उपचार गरि थप उपचारका लागि वीरगञ्ज ल्याइएको छ । अन्य दुई जना घाइतेको भने पोखरिया अस्पतालमै उपचार भइरहेको छ ।