बरहथवामा विभिन्न जातको १ हजार बिरुवा रोपिँदै

बरहथवा । सर्लाहीको बरहथवा नगरपालिका र डिभिजन वन कार्यालय सर्लाहीले आजबाट वृक्षारोपण कार्यको थालनी गरेको  छ ।

नयाँ रोड वरहथवा सडक खण्डको मुर्रियादेखि बरहथवा बजारसम्मको करिब तीन किलोमिटर सडकको दुवैतिर विभिन्न जातको एक हजार बिरुवा रोपिने डिभिजन वन कार्यालय सर्लाहीका प्रमुख मंजुर आलमले जानकारी दिनुभयो ।

बरहथवा नगरपालिका मेयर कल्पना कटुवालले आज वृक्षारोपण कार्यको थालनी गर्नुभएको हो ।

डिभिजन वन कार्यालयले उपलब्ध गराएको गुलमोर, कल्की, अशोक, निमलगायत वातावरणमैत्री  जातका बिरुवा रोपिने सहायक वन अधिकृत सिपी यादवले जानकारी दिनुभयो ।

नगरपालिकाले अन्य सार्वजनिक ऐलानी र सडकको दायाँबायाँ क्रमशः वृक्षारोपण गर्दै जाने जनाएको छ ।