चौतारामा ४५४ लाई निःशुल्क स्वास्थ्य सेवा

सिन्धुपाल्चोक।चौतारा साँगाचोकगढी नगरपालिकाको आयोजना तथा जागरण राष्ट्रका लागी युवा (युथ फर नेशन) को प्राविधिक सहयोगमा एक दिने निःशुल्क स्वास्थ्य परीक्षण शिविर सम्पन्न भएको छ ।

मङ्गलवार चौतारा साँगाचोकगढी नगरपालिका वडा नं ७ मेलचौरमा भएको शिविरमा विभिन्न रोगबाट आजित भएका ४ सय ५४ जनाले निःशुल्क स्वास्थ्य सेवा लिएका छन् । स्वास्थ्य परीक्षणको क्रममा जटिल रोग देखिएका तथा अप्रेसन गर्नुपर्न १८ जनालाई काठमाडौँ रिफर गरिएको छ ।

रिफर गरिएका मध्ये आँखाको अप्रेसन गर्नुपर्ने बिरामीहरूलाई टिचिङ हस्पिटलमा १ हजार शुल्कमा अप्रेसन गर्ने व्यवस्था मिलाइने टिचिङ हस्पिटलका मानसिक रोग विशेषज्ञ तथा युथफर नेसनका अध्यक्ष निकोलस भुषालले जानकारी दिनुभयो ।

स्त्री तथा प्रसूति रोगको जटिल समस्यामा रहेकाहरूलाई युथफर नेसनको समन्वयमा काठमाडौँका विभिन्न हस्पिटलमा निःशुल्क उपचार गरिने चौतारा साँगाचोकगढी नगरपालिका उपमेयर जानुका पराजुलीले जानकारी दिइन् । नगरवासीको स्वास्थ्य समस्या समाधानको लागि नगरपालिकाले सधैँ चासो दिँदै आएको उहाँले बताउनुभयो ।नगर स्वास्थ्य प्रमुख शिव पुरीले दिएको जानकारी अनुसार शिविरमा निम्नानुसारले सेवा प्रधान गरिएको छ ।

स्त्री तथा प्रसूति रोग २ सय ५० जना, दन्त रोग १ सय ५० जना, आँखा रोग २ सय १० जना , नाक कान घाँटी ७८ जना, मानसिक स्वास्थ्य २२ जना,फिजियोथेरापी ५१ जना, हाड जोर्नी तथा नसा रोग १ सय ५० जना, बालरोग १५ जना, सर्जिकल ५८ जनाले निःशुल्क स्वास्थ्य सेवा लिएका हुन् ।

एक जनाले एक भन्दा बढी प्रकारको सेवा लिएकाले जम्मा सङ्ख्या भन्दा छुट्टाइएको सङ्ख्या बढी देखिएको स्वास्थ्य शाखा प्रमुख पुरीले जानकारी दिनुभयो ।