सुदूरपश्चिमका चार प्रादेशिक अस्पताललाई शिक्षण अस्पतालको रुपमा प्रयोगमा ल्याउने सम्झौता

धनगढी । सुदूरपश्चिमका चार वटा प्रादेशिक अस्पताललाई शिक्षण अस्पतालको रुपमा प्रयोगमा ल्याउने गरि सम्झौता भएको छ । 

कैलाली स्थित सेती प्रादेशिक अस्पताल, टिकापुर प्रादेशिक अस्पताल, लम्की प्रादेशिक अस्पताल र कञ्चनपुरको महाकाली प्रादेशिक अस्पताललाई सहिद दशरथ चन्द स्वास्थ्य विज्ञान विश्वविद्यालयको शिक्षण अस्पतालका रुपमा प्रयोग गर्ने गरि दुई पक्षीय सम्झौता भएको हो । 

आज सुदूरपश्चिम प्रदेश सरकार, सामाजिक विकास मन्त्रालय र स्वास्थ्य विज्ञान विश्वविद्यालयका बिच चार वटा अस्पताललाई शिक्षण अस्पतालको रुपमा प्रयोगमा ल्याउने गरि सम्झौता भएको स्वास्थ्य महाशाखा प्रमुख रमेश मलासीले बताउनुभयो । सामाजिक विकास मन्त्री सन्तोष शर्मा थापाको उपस्थितिमा दुई पक्षीय सम्झौता सम्पन्न भएको उहाँले बताउनुभयो । सम्झौताको अवधि २० वर्षको रहेको छ । 

उक्त सम्झौता पत्रमा सामाजिक विकास मन्त्रालयका तर्फबाट निमित्त सचिव डा. निरज अर्याल र विश्वविद्यालयका तर्फबाट रजिस्टार डा.भिम बहादुर चन्दले हस्ताक्षर गर्नुभएको छ । प्रदेश सरकारको साउनमा बसेको मन्त्रिपरिषद् बैठकले चार वटा प्रादेशिक अस्पताललाई शिक्षण अस्पतालको रुपमा प्रयोगका लागि सहमति दिने निर्णय गरेको थियो ।

सरकारले गेटा स्थित स्वास्थ्य विज्ञान विश्वविद्यालयमा यसै शैक्षिक सत्र देखि चिकित्सा शिक्षा चार वटा कार्यक्रम सञ्चालन गरिने जनाएको छ । हाल गेटामा तीन सय शय्याको अस्पताल सञ्चालनको तयारी भइरहेको छ ।